- Xehetasunak
Aurtengo Txakur Eredugarri Programaren edizioaren lehen formakuntza ikastaroa martxoaren 5ean hasiko da eta izen ematea zabalik dago udalaren webean
Euskal artzain txakur erakustaldi, eta adineko pertsonei zuzendutako saio teoriko-praktikoei jarraipena emango zaie
Udalerriko txakur jabeak arduratsuak izateko eta herritarren arteko bizikidetza hobetzeko helburuz Udalak sortutako programa aitzindaria da
2024ko Txakur Eredugarri Programak datozen egunetan hasiko du bere ibilia. Herritarren arteko bizikidetza eta udalerri atsegin, txukun, eroso eta bizigarria izateko helburuari jarraiki, Beasaingo Udalak sortutako programak bostgarren edizioa beteko du honela. Animalien jabetza arduratsutik abiatuz, txakurren eta pertsonen arteko elkarbizitza hobetzera dator programa hau.
Jabe eredugarri izateko formakuntzak, sozializazio paseoak, Euskal Artzain Txakurren erakustaldiak eta hirugarren adinekoen tailerrak osatuko dute berriz ere aurtengo programa.
Formakuntza arrakastatsua
Udal gobernuak ekimen hau abian jarri zenetik, 110 jabe-txakur bikoteek hartu dute parte formakuntzetan eta sozializazio paseotan. Arrakasta hau ikusirik, bosgarren urtez jarraian, aurten errepikatuko diren Jabe Eredugarri izeneko formakuntza intentsiboen hiru txanda antolatu dira bakoitza zortzi saio presentzialez osatua. Martxoaren 5ean hasi eta asteartero burutuko dira udaletxeko plazan 18:00tan. Eskaera asko jasoko balira, bigarren talde bat ere osatuko litzateke. Honela, hurrenez-hurren astero burutuko dira saioak azterketara iritsi arte. Bertan, kanpotik etorritako hezitzaile-aztertzaile batek azterketa bat egingo die parte hartu nahi duten txakur-jabe bikoteei. Horrela, azterketa gainditzen dutenek txakur heziketa titulu ofiziala jasoko dute.
Saio hauetara txakur jabeak txakurrekin etorri beharko dira, bat pertsonako, eta saioak praktikoak izango dira. Ekintza honetan parte hartzeko izena eman beharko da Beasaingo Udalaren webean aurkitzen den txakur eredugarri programako atalean helbide honetan .
Sozializazio paseoak ere jarraipena izango dute. Ostegunero errepikatuko dira. Jabeak eta txakurrak Loinazko San Martin plazatik abiatuko dira arratsaldeko 18:00etan. Nahitaezkoa izango da kurtsoan izena ematea paseoetara batzeko.
Euskal artzain txakur erakustaldia
Egitasmoan ikusgarritasuna duen ekimenetako bat Euskal Artzain Txakurren erakustaldia da, iaz Igartzako Monumentu Multzoko zelaian bigarrengoz egin zena. Saio honen helburua, gurea den eta desagertzeko arriskuan dagoen arraza bat ezagutarazi eta balioan jartzea da. Horretarako, txakur hauen gaitasun eta abileziak agerian jarriko dituen erakustaldi bat burutuko da maiatzeko lehen astebukaeran.
Adineko pertsonekin elkarri eragin
Berriro martxan jarriko den beste edukietako bat hirugarrenez adinekoekin burutuko diren tailer teoriko-praktikoak izango dira. Txakurrak laztandu eta beraiekin komunikatuz, estimulazio kognitibo eta sentsoriala landuko dute, baita komunikazio afektibo eta ludikoa indartu ere. Arangoiti Nagusien Egoitza, Eguneko Zentroa, Urbiberri gizarte egoitzan ordubeteko saioak egingo dituzte txakur hezitzaile profesionalen gidaritzapean.
Kontzientziazioa eta sentsibilizazioa
Egunetik egunera, handitzen doa maskota kopurua udalerrian. Horregatik, ezinbestekoa da txakurrak dituztenen eta ez dituztenen arteko elkarbizitza eta harreman egoki baterako baliabideak eta bitartekoak eskaintzea.
Txakur eredugarri programak, bitarteko ezberdinak erabiliz, txakurren eragina eta hauekin harremana izan dezaketen eremu eta eragile guztiengana iritsi nahi du. Horrela, txakur gorotzak kalean uztea edo txakurrak gune publikoan aske eramatea bezalako dinamikak ezabatu nahi ditu formakuntza eta sentsibilizazioaren bitartez. Beasaingo Udalak programa hau elkarlanean burutuko du Arriaran auzoan kokatuta dagoen Kangune txakurren trebakuntzan espezializatutako zentroaren laguntzarekin.
- Xehetasunak
Beasain eta batez ere gaztetxo beasaindarrak euskalduntzeko ekimen berria dakar Udalak Goierri Telebistaren bitartez herriko ikastetxeen parte hartzearekin, “Kantari Beasain”. Zortzi eta hamabi urte bitarteko 275 neska-mutiko beasaindarrek parte hartuko dute kulturgintza eta euskalduntzea helburu duen saioan.
Beasaingo Udalak bere helburu eta ardatzetako bat du euskararen ezagutza eta erabilera sustatzea eta proposamen berri honekin, ahalegin horretan indar egiten jarraitu nahi du. Leire Artola alkatearen hitzetan, “Kezkatik baño arduratik ikusten dugu euskararen erabilera ahalik gehien zabaltzearena. Euskara erakargarri izatea behar du euskaldunon egiteko behinena eta gazteen artean egin nahi dugun ahalegin horretan kokatzen dugu ekimen hau”.
Ekimenarekin bat egin dute Beasaingo lau ikastetxeek ere: Murumendi eskolak, Andramendi ikastolak, Alkartasuna Lizeoak eta La Salle Beasain ikastetxeak. Ikastetxetik kanpo ere, aisialdian, helburuak bete eta euskaraz jarduteko aitzakia badelako guraso eta gaztetxoentzako dinamika hau.
Hori horrela, helburuak nola beteko diren adierazi du Leire Artola Alkateak: “Euskara modu dibertigarrian erakargarri bihurtuz eta bide batez euskal kantugintza eta kultura gazteei helaraziz. Aldi berean, gurasoak euskal kulturara ere erakartzen ditugu kate honetan, ondo pasatuz eta euskara gozamenarekin lotuz. Goierri telebistaren proposamenari baiezkoa emanda, herriko ikastetxeen laguntza eta elkarlana eskertu beharrean gaude. Kantari saioa finean, euskarara modu dibertigarrian gaztetxoak erakartzeko modua da, haur eta gazteak euskaraz kantuan eta dantzan jartzen dituen ikuskizuna da, gazteak eurak ikuskizuneko protagonistak bihurtuz”.
Emanaldiak otsailaren 24a, larunbata, eta otsailaren 25a, igandea, egingo dira Usurbe Antzokian. Guztira 11 emanaldi egingo dira eta herritarrek zuzenean emanaldiez gozatzeko aukera izango dute. Doakoak izango dira emanaldi guztiak eta ez da ez sarrera ez gonbidapenik behar izango.
Horretaz gain, Goierri telebistako zuzendariak adierazi duen bezala, “zuzenean streaming bitartez ere jarraitu ahal izango dira emanaldi guztiak. Larunbatean, 15:00etatik aurrera eta igandean, aldiz, goizeko 11:00etatik aurrera, ‘gitb.eus’ atarian. Zuzeneko emanaldiak eta gero, webgunera ere igoko dira saioak eta gurasoei ere bidaliko zaie saioaren lotura zuzena”.
Astero bi saio estreinatuko dira telebistan, asteartetan eta ostegunetan, 21:00etan. Asteburuetan errepikatuko dira.
- Xehetasunak
Udalak Aldundiko Gazteria zuzendaritzaren laguntzarekin antolatutako Treba Gurasoak prestakuntza-eskaintzak hiru hitzaldi eskainiko ditu datozen astetan Beasainen
Pornografia, harremanak eta osasun mentalari buruzkoak izango dira eta aldez aurretik izena eman beharko da
Treba Gurasoak prestakuntza eskaintzaren hirugarren edizioa beteko da Beasainen, eta hiru hitzaldi eskainiko dira datozen astetan. Aurreko ikasturtetan izandako emaitza positiboaren ondorioz aurtengoan ere Beasaingo gurasoei eskaintza bera egitea erabaki du Beasaingo Udalak. Gipuzkoako Foru Aldundiko Gazteria Zuzendaritzarekin elkarlanean antolatutako Treba Gurasoak prestakuntza-ekimenak, gurasoak hezkuntza gaitasunetan trebatuz, haurren eta nerabeen bizi-kalitatea eta aukerak hobetzeko helburua du.
Ez dago zalantzarik seme-alaben bizi-garapenean laguntzeko gurasoek jokatzen duten papera garrantzitsua dela. Haur eta nerabeen heziketa-prozesuan, guraso guztiek behar dute momenturen batean laguntza, guraso bezala dituzten funtzioak era egokian garatzeko. Laguntza edo sostengu horrek, ordea, ez du izan behar konpontzailea edo terapeutikoa bakarrik; aitzitik, helburu prebentiboa izan behar du, eta familiako kide guztien garapena sustatu.
Pornografia, harreman osasuntsuak eta osasun mentala
Aurtengo edizio honetan aurreko urteko esperientzian oinarrituta, parte hartu zuten gurasoek eskatutako gaiak eta proposatutako hobekuntzak kontuan hartu dira. Beasainen burutuko diren hitzaldiak hiru, doan eta Igartzako jauregian eta Alkartasuna Lizeoan izango dira arratsaldeko 18:00etan.
Lehena datorren otsailaren 27an. “Pornografia gaur egungo sexu-heziketa ote?” izenburupean, nerabeen gurasoei zuzenduta egongo da. Trebatzailea Eider Goiburu izango da eta landuko diren edukiak, gailentzen den pornografia-eredua eta ezaugarriak, pornografia eta nerabeen iruditegia, familien funtzioa sexu-heziketan eta sexu-heziketza hezkidetzaile baterako gakoak.
Bigarren hitzaldian martxoaren 4an, “Harreman osasuntsuak lagun artean” gaiaren inguruan arituko da Nerea Mendizabal. Seme-alabek lagunen artean dituzten zailtasunetan gurasoei zein leku dagokien hausnartuko da, izan ditzaketen gatazketan laguntzaile osasungarri bilakatzeko. Beraien liskarretan noiz eta nola esku hartu proposatzeaz gain, ideiak proposatuko dira helduen jarrera lagungarri eta oztopagarriak identifikatu, eta mingarriak diren jarrerak egin edo jaso ditzaketenerako.
Eta hirugarren hitzaldia, martxoaren 21ean izango da Alkartasuna Lizeoan. “Osasun mentala eta nerabeak” izenburupean, honako helburu hauek landuko dira: Seme-alaben hazkuntzan familiak duen babesteko zereginaren garrantzia sustatzea. Deserosotasuna, antsietatea eta jazarpen-egoerak detektatzeko eta identifikatzeko ezagutzak eta oinarrizko informazioa ematea eta balizko jazarpen-egoeren aurrean egoki eta indarkeriarik gabe erantzuten lagunduko dieten trebetasunak eta estrategiak ematea.
Hitzaldiak euskaraz izango dira eta parte hartzeko, ondorengo estekan eman beharko da izena.
- Xehetasunak
Ordenantza alegazio fasean aurkitzen da eta jendaurrean egongo da martxoaren 15a arte behin-betiko onespena jaso aurretik
Herritarrek eginiko iradokizunen ondoren, Gipuzkoa plazan egoiliarrentzako plaza kopurua %50 handituko da
Trafiko eta aparkalekuen ordenantza berriak beste urrats bat eman du behin betiko gauzatu aurretik. Udalbatzaren osoko bilkurak, trafiko eta aparkalekuen ordenantzari (TAO) kontsulta epean aurkeztutako iradokizunen ebazpena egin du eta dokumentu eguneratuari haserako onespena eman dio.
Egoiliarrentzako aparkaleku gehiago
Onartutako iradokizunen baitan, araudian txertatu diren baldintza berriak hauek izan dira besteak beste; larunbat goizetan TAO zerbitzua 09:00etatik 13:00etara mantenduko da eta Loinatz landa auzoko bizilagunak, egoiliarrentzako aparkamendu baimenaren onuradun posibleen artean sartuko dira. Bestalde, Udalak zorrotz aztertu du Gipuzkoa plazako erabilera, ordu-tarteka, baita erabiltzen duten erabiltzaileen ibilgailuen ehunekoa ere. Ondorioz, bertakoentzako izango diren aparkaleku kopurua 80tik 120ra pasatuko da, alegia %50 handituko da (aparkaleku perimetral guztiak eta Zaldizurreta 9-19 atzea barne).
Hori horrela, onartutako iradokizunak txertatuta, TAOren ordenantza aldaketari hasierako onespena eman zaio eta jendaurrean jarri da 30 laneguneko epean alegazioak aurkezteko. Epe horretan ez bada inolako alegazio edo erreklamaziorik aurkezten, behin-betiko onartua geratuko da.
Sektore berria eta mugikortasun aktiboa
Egun, Ezkiaga eta erdiguneko TAO sektoreak bereizten diren bezala, ordenantza berriak hirugarren sektore bat sortzea proposatzen du Barrendain plazatik gora. Hain zuzen ere, Garmendia-Otaola ardatzetik mendebaldera Dolarea parkera arte gelditzen den eremua; Dolarea kalea 12-13 eta Foru kalea 74 izango lituzke muga. Horrela hiru TAO sektore desberdin egongo lirateke udalerrian: Ezkiaga (ZE), egungo erdiguneko TAO eremua (S1) eta proposatzen den eremu berria (S2).
Sektoreka banatzearen helburua, egoiliar baimena udalerri barneko desplazamenduak autoz egiteko tresna ez bilakatzea da. Horrela, egoilarrak gune urdinean edo egoiliarren aparkaleku berezietan aparkatu ahal izango dute, beti ere bakoitzari dagokion sektorean. Ezinbestekoa den kasuei begira, egoilarrek eta beste edonork S1 eta S2 sektoreetako gune berde, urdin, eta marroietan 20 minutuz doan aparkatu ahal izango dute, betiere txartela aterata. Malgutasun hau eskaintzearen arrazoia, garraio astun, presazko zerbitzu edo mugikortasun murritzeko pertsonak jasotzeko ibilgailu bidezko barne-desplazamenduak erraztea da.
TAO zerbitzua mugikortasun aktiboaren aldeko tresna baliagarri bilakatu nahi da eta zentzu horretan, S2 sektore berriak Beasaingo oinezko edo bizikleta bidezko desplazamenduak sustatzeko helburua ere beteko du.
Herri barruko trafikoa arindu
Kontuan izanda Beasain eskualdeko industria, zerbitzu eta garraio publikoen topagune dela, egunero inguruko herrietatik iristen den auto kopurua altua da. Honek, bereziki udalerriaren erdigunean eta Barrendain plaza inguruan eragiten du.
Antolamendu berriarekin, ibilgailua Bernedoeneako, Gipuzkoa plazako eta Gernika pasealekuko aparkalekuetan uzteko ohitura indartu nahi da. Beasaingo errepide sarrera-irteeretatik gertu egoteaz gain, herri erdigunetik ere hurbil daude. Aparkaleku plaza kopuru altua eskaintzen dutenez, baldintza aproposak ematen dira kanpotik datozen ibilgailuak bertara bideratzeko. Horrela herri barruko trafikoa murriztuko litzateke, bide segurtasunean eta airearen kalitatean positiboki eragingo luke.
Bernedoeneak doako aparkaleku izaera mantenduko luke 318 plazarekin. Gipuzkoa plazan egoilarrentzako aparkalekuak gune berdearekin konbinatuko lirateke (120 eta 145 plaza hurrenez-hurren) eta Gernika pasealekuan 26 plaza berde eta 90 urdin eskainiko lirateke.
Aparkaleku guztietan lehen 20 minutuak doan
Hauek izango dira koloreen arabera aparkaleku ezberdinetako ezaugarri nagusiak, non guztietan lehen 20 minutuak doan izango diren.
Gune marroia (txandakatze altukoa): lehen 20 minutuak doan izango dira eta gehienez 120 minutu aparkatu ahalko da. Egoiliar txartelarekin ezingo da aparkatu. Gernika pasealekuko frontoi atzea, Barrendain plaza eta Anbulategia.
Gune urdina (txandakatze ertainekoa): lehen 20 minutuak doan izango dira eta gehienez 240 minutu aparkatu ahalko da. Goiz edo arratsaldeko ordutegi blokeak osatzeko aukera. Egoiliar txartelarekin aparkatu ahal izango da, betiere sektore berekoak badira. Erdigunean, S1 eta S2 sektoreetan kokatzen da.
Gune berdea (txandakatze baxukoak, aparkaleku disuasorioak): lehen 20 minutuak doan izango dira eta gehienez 450 minutu aparkatu ahalko da, egun osoa. Egoiliar txartelarekin ezingo da aparkatu. Landa-auzoetako herritarrak salbuespena izango dira. Gipuzkoa plaza eta Gernikako pasealekua.
Gune gorria (Ezkiaga): Orain arte bezala. Ezkiaga auzoko egoiliarren ibilgailuak baino ezin dira aparkatu eta ordutegi berezia izango dute: astelehenetik ostiralera 23:00etatik 08:30era. Ezkiaga (ZE) sektorea.
Egoilarren gunea B-R (berria): S1 edo S2 sektoreetan txarteldun egoiliarrek soilik aparkatu ahal izango dute urte guztian zehar, 24 orduz. S1 sektoreko egoiliarrek ezingo dute S2 sektoreko egoilarren plazetan aparkatu eta alderantziz.
Alegazioak aurkezteko epea martxoaren 15ean amaituko da eta IGunean presentzialki edo online Udalaren webguneko egoitza elektronikoaren bitartez egin ahal izango dira. Epe guztiak betez gero, ordenantza berria irailean sartuko da indarrean.
