- Xehetasunak
Herritar hauen gizarte premiak eta arriskuak antzeman eta etxeko suteak prebenitzeko zerbitzua kontratatzeko baldintza pleguak onartu dira
Ekimenak hasiera-hasieratik lortu nahi izan du erabiltzaileen bizi-kalitatea hobetzea, beren ohiko bizitokian ahalik eta denbora gehien bizitzen jarrai dezaten
Beasaingo Udalak, adinekoen etxeetan dauden arriskuak gutxitzeko asmoz, suteak prebenitzeko sistema berriak jartzeko zerbitzua ematen jarraitzen du, eta erabiltzaileen beharren balorazioak egiten ditu. Era berean, urteko berrikuspenak egiten jarraitzen da aurreko urteetan instalazioa egin zen etxebizitzetan.
Zerbitzu honen bidez, Beasainen bakarrik edo adin bereko edo gehiagoko beste pertsona batekin batera bizi diren 80 urtetik gorako pertsonen kalteberatasun-egoera ezagutu nahi da. Kolektibo horri kalitatezko babesa eskaini ahal izateko, Udalarentzat lehentasunezkoa da bere gizarte-beharrak eta arrisku-egoerak antzematea, beharrezkoak diren gizarte-prestazioak eta -zerbitzuak eskaintzeko. Ekimenaren helburua, gainera, pertsona hauek beren ohiko etxebizitzan ahalik eta denbora gehien eta baldintza onenetan bizi ahal izatea da.
Biztanleriaren zahartzeak premia berriak dakartza berekin, eta horiei aurre egin behar zaie. Adinean aurrera egin ahala eta, batez ere, bakarrik bizi diren pertsonen kasuan, haien bizi-kalitatean zuzenean eragiten duten hauskortasun edota arrisku adierazle gehiago ikus daitezke.
Suteen prebentziorako detektagailuak
Suteen jatorria hainbat faktorek eragiten dituzte, eta horietako batzuk aurreikusi ezinak izan daitezkeen arren, normalean etxebizitzaren egoera eta giza faktorea erabakigarriak izaten dira. Horri dagokionez, Beasaingo Udalaren eskumena izanik gizarte-zerbitzuak antolatzea, planifikatzea eta kudeatzea, pertsona kalteberen etxeetan suteak prebenitzeko sistemak jartzea eta berrikustea funtsezkoa da horrelako arriskuak minimizatzeko.
Azpimarratu behar da, azken lau urteetan, Beasaingo Udalak 303 pertsona dauzkala “Premia sozialak eta arriskuak detektatzeko eta suteak prebenitzeko” zerbitzuan. Udalaren helburua arlo honetan aurrera egiten jarraitzea da, urtero 50 pertsona gehiagorengana iritsi ahal izateko.
Beasaingo gizarte ongizate saila Helbide elektroniko hau spam roboten kontra babestuta dago. JavaScript aktibatuta eduki behar duzu hau ikusteko. 943 028075
- Xehetasunak
Haur eta nagusien kartelak aukeratuko dira eta lanak aurkezteko epea martxoaren 17a arte egongo da zabalik
2024ko Loinatz jaien antolaketan hasiak dira Udala eta herritarrak. Jaietako batzordea bildu da eta Udalak bere aldetik azken osoko bilkuran jaiak iragarriko dituen kartela aukeratzeko lehiaketaren oinarriak onartu zituen.
Jaiak iragartzeko irudia izateaz gain, kartel irabazlea jaietako egitarauaren azala ere izango da. Aldi berean, 7-15 urte bitartekoentzat eskolen arteko jaietako kartelen beste lehiaketa antolatzen da, gaztetatik horrelako ekimenekiko interesa eta zaletasuna pizteko.
Beraz, kartel-lehiaketako parte-hartzaileak bi taldetan banatuko dira: nagusiena edo 2008 (barne) urtera arte jaiotakoak eta haurrak 2009-2017 (biak barne) urte bitartekoetan jaiotakoak.
Baldintza nagusiak eta balorazio irizpideak
Aurkeztuko diren lanek baldintza nagusi hauek bete beharko dituzte; formatuari dagokionez, nahitaez, bertikala izan behar du eta karteletan derrigorrean “2024ko LOINATZ JAIAK maiatzaren 10etik 19ra” esaldia azaldu beharko da. Lanak inoiz argitaratu gabeak izan behar dute eta ezingo dute aldarrikapen politikorik edo sexistarik izan, ezta estereotipo sexistekin ala alkoholaren edo drogen kontsumoarekin zerikusirik duen mezurik, irudirik edo bestelako elementurik.
Orohar, kartel irabazleen aukeraketan kontuan hartuko diren irizpideak berriz, hauek izango dira; Loinatz jaiekin edota Beasaingo jaietako ohiturekin lotura izatea, lehiaketaren helburuarekin lotura izatea (jaiak iragartzea), eta noski, sormena, teknika eta ideia berrien ezaugarriak agertzea.
Epaimahaiak aukeratuta, bigarren fase batera pasako diren lanen artean bozkatuko dute herritarrek. Lan bakoitzak zenbaki bat eramango du eta herritarrek martxoaren 27tik apirilaren 14ra bitarte arte bozkatu ahal izango dute. Udal web atarian, www.beasain.eus helbidean agertuko den estekaren bitartez edo aurrez aurreko aukeraz baliatuz, udaletxera etorriz botoa ematera. Udaletxeko sarrera nagusian buzoia eta botoa emateko fitxa batzuk egongo dira. Adierazitako bi modu horietako edozeinetan, Beasainen erroldatutako pertsonek bakarrik bozkatu ahal izango dute.
Jaiak iragarriko dituen kartel irabazlea aukeratzeko “Bozken” fasean, gehienez, 100 puntu emango dira, honela banatuta: epaimahaiaren bozkak 50 puntu eta herritarren bozkak: 50 puntu.
Sariak hauek izango dira: Nagusien mailako (A taldeko) irabazleari 600 euro eta gaztetxoen (B taldeko) irabazleari 180 euro.
Nagusien taldeko irabazlearen lana 2024ko Loinatz Jaien kartela eta jaietako programaren azala izango da. Gaztetxoen taldeko irabazlearen kartela jaietako programan joango da
Lanak aurkezteko epea, 2024ko, martxoaren 17an amaituko da, 23:59ak baino lehen.
Xehetasun gehiago lehiaketaren oinarrietan.
- Xehetasunak
Beasaingo Odolkiaren kofradiak bere XXXVII. kapitulua ospatuko du eta Lemniskata elkartea eta Aitor Buendía kazetaria kofradiako ohorezko kide izendatuko ditu
Urbiberri gizarte zentroak, Isabel Aldaregia Latorre eta Jose Mari Orbezabal Rábanos bazkideak omenduko ditu bere jaiaren barruan
Urrezko binakako aizkolari txapelketa bezperan jokatuko da Dolarea parkean. Gainontzean, haurrentzako pailazoak, Murumendi pilota eskolako haurren partiduak, eta musika ibiltaria egongo dira
Beasaingo Udalaren helburua izan da Loinazko San Martin egunari garrantzi berezia ematea. Herriko zaindariaren heriotzaren eguna goratzeko, otsailaren 5ari esanahi berezia eman nahi zaio eta hartara, ekitaldiz jantzi dute aurten ere Udalak eta herriko hainbat eragile eta elkartek eguna. Aurten astelehena izan arren, nortasunarekin eta tradizioei lotutako ekitaldi ezberdinak antolatu dituzte eta hauek aurkezten izan dira udaletxean.
Agerraldian Leire Artola alkatearekin batera, Elena Ruiz merkataritza eta kirol arloko zinegotzia, Juanjo Ganzarain eta Martin Urkiola odolki kofradiaren kideak, Carlos Posa Urbiberri gizarte zentroko ordezkaria eta Luis Mari Bengoa Egur Sport elkarteko arduraduna egon dira. Bakoitzak bere aldetik azaldu ditu ekitaldien xehetasunak.
Alkatearen hitzetan, “herriko zaindariaren eguna ospatzeak Beasainen kultura eta historia erakusten du, eta beasaindarrak batzen gaitu. Hargatik, herritartasun hori indartu eta adierazi nahi dugu, esanahia eman nahi diogu. Ospakizun honetan, jaia, dantza, musika, eta gastronomia izan ohi dira protagonista eta aurkeztera gatozen egitaraua horren adierazpide da”.
Elena Ruiz, merkataritza eta kirol arloko zinegotziak segidan, otsailaren 5ari lotutako ekitaldien berri eman du. Musikarekin lotuta, igandean, otsailaren 4an, Santa Ageda bezpera, Andre Mari jasokundearen parrokian 12:00tako mezan, Loinatz eta Narama abesbatzak abestuko dute. Kantujirakoak aldiz arratsaldean irtengo dira kopla kantari 18:30ean. Igandean jarraituz, herri kirolen ordua izango da Urrezko aizkolariekin.
Urrezko binakako aizkolari txapelketa
“Urrezko” aizkolarien txapelketak ez du hutsik egingo aurten. Beasainen jokatuko den jardunaldia otsailaren 4an, eguerdiko 12:00etan hasiko da Dolarea parkean (euria egingo balu Antzizar kiroldegiko frontoian). Herri kirola zaindu eta bultzatzeko helburuari eusten dio Udalak ekitaldi honekin. Aizkoran lehian izango diren bikoteak ez dira nolanahikoak Luis Mari Bengoa antolatzaileak azaldu duenez, goi mailako izenez osatua dago Beasaingo saioko kartela.
Honela, 2024ko urrezko binakako aizkolari txapelketa Eusko Label Saria lehiaketako jardunaldian nor baino nor ariko dira hiru bikote hauek: Iker Vicente eta Arkaitz Etxebeste, Julen Gabirondo eta Xabier Zaldua, eta Joxean Etxeberria eta Oier Kañamares. 36 enbor bost izakeratan moztu beharko dituzte.
Gazte mailako banakako aizkolari txapelketari dagokionez, Isidro Velasco Markel Kortinaren aurka eta Aritz Oiarbide, Jakes Iruretagoiena “Izeta V” aurka arituko dira. Egitaraua osatzeko, Binakako gizonezkoen harrijasotze txapelketan, Aimar Galarraga eta Beñat Telleria ariko dira eta emakumezkoen banakako harrijasotze txapelketan Karmele Gisasola “Zelai III” jardungo da lanean.
Ekitaldia ETBk grabatuko du arratsaldeko 16:00etan bere lehen katean eskaintzeko.
Lemniskata eta Aitor Buendía ohorezko kofrade berriak
Loinazko San Martin egunean protagonismo berezia izaten du Beasaingo Odolkiaren Kofradiak. Aurten 37. kapitulua ospatuko dute eta kofradiako ohorezko kide berriak izendatu. Aurten izendapen hori honako hauek jasoko dute: Lemniskata zientzia elkarteak eta Aitor Buendía kazetariak. Juanjo Ganzarain kofradiako kideak azaldu du 21 kofradietako 90 ordezkari izango direla Beasainen; 12 Hego Euskal Herrikoak, 1 ipar Euskal Herrikoa, 2 Galiziar, 3 Kantabriakoak, eta bana Errioxa, Valladolid eta Zaragozatik. Ekitaldi nagusia eguerdiko 12:00etan burutuko da Loinazko San Martin plazan baina aurretik eta ondoren kanpotik datozen kofradiei ongietorria egin eta desfilea, meza nagusia, zaindariaren estatuan lore eskaintza eta dantza, Zubimuzu plazan odolki dastatze herrikoia eta plazapean adiskidetasun bazkaria egingo dira.
Goizeko ekitaldietan lagun eta gidari izango dituzte Goizeresi elkarteko txistulariak eta Loinatz Musika Eskolako banda. Eguerdian plazako kioskoan emanaldia eskainiko dute ekitaldi nagusiaren atarian.
Urbiberrin omenaldia
Urbiberri gizarte zentroko ordezkari Carlos Posak, egoitzak antolatutako ekitaldien berri eman du. 1.000 bazkide inguru biltzen dituen gizarte egoitzan 13:30ean, bazkideentzako hamaiketakoa eskainiko da. Arratsaldeko 17:00etan Isabel Aldaregia Latorre eta Jose Mari Orbezabal Rabanos omendu ondoren, Aurtzaka dantza taldeak dantza-saioa eskainiko du. Ondoren 17:30ean Gurea abesbatzaren ekitaldia izango da. 18:00etan Urbiberri Gizarte Zentroko “Argi” dantza taldeak emanaldia eskainiko du eta ondoren dantzaldia 21:00ak arte luzatuko da.
Musika, pilota partiduak eta pailazo ikuskizuna
Eguna borobiltzeko, beste ekitaldi batzuen berri ere eman dute udal arduradunek. Honela, Murumendi pilota eskolako neska-mutilen pilota partiduak arratsaldeko 16:30ean jokatuko dira Gernika pasealekuko frontoian. Etorkizuneko pilotariak ikusteko aukera ezin hobea. Musika ere kalez-kale barreiatuko du 18:00etatik aurrera “ Bentazaharreko mutiko alaiak” taldeak. Eta familia osoarentzat 18:30ean, Ekain pailazoaren "Slapstik" ikuskizuna Erauskin plazan. Euria egingo balu La Salle ikastetxean izango da.
Santageda jaiak Matxinbenta auzoan
Garai berean Santa Ageda jaiak ospatzen dira Beasaingo Matxinbenta auzoan. Duela bi urte ospatu ziren azkenekoz pandemia eta beste arrazoi batzuk medio. Aurten auzotarrek berriro heldu diote Santa Ageda jaiak ospatzeko ohiturari eta otsailaren 3, 4 eta 5erako egitaraua antolatu dute. Udalaren web-eko agendan aurkitzen dira ekitaldi guztiak adierazita, eta herri kirolak, bertso afaria, pilota partidak, eta musika ez dira faltako.
Udal arduradunek, herriko eragile eta elkarteen lana eskertu dute otsailaren 5ari merezi duen garrantzia emateko egindako lanagatik eta herritar zein kanpotik etorriko direnei gonbidapena luzatu diete ospakizunetan parte hartu dezaten.
- Xehetasunak
Saltokietako errotuluak, irudi korporatiboa eta web-guneak euskaraz jarzeko dirulaguntzen oinarriak onartu ditu aho batez udalbatzak
Aurtengo Loinatz jaiak iragartzeko kartelen lehiaketako oinarriak onartuta, martxoaren 17an amaituko da lanak aurkezteko epea
Gobernu batzordean, kale argiteria LED sistemara aldatzen jarraitu eta kiroldegian Powerlifting gela berria egiteko lanak kontratatzea onartu zen
2008 urteaz geroztik, Beasaingo udalak diru laguntzak ematen dizkie merkatarie saltokietako errotuluak, irudi korporatiboa euskaraz eta web-gunea euskaraz osorik edo elebitan/anitzetan jartzeagatik. Dirulaguntza hauen helburua merkataritza arloan hizkuntza paisaia euskalduntzea da, eta gaztelaniaz dauden errotulu nagusi eta irudi korporatiboko elementuak euskaraz jartzea.
Euskararen presentzia merkatal euskarrietan indartzeko konpromiso hori indartuz 2019an dirulaguntza oinarrietan aldaketa batzuk txertatu ziren eta diru kopurua handitu egin zen. Asmo horrekin jarraituz, merkatariek euren jarduera publizitatzeko asmoz errotuluetan, irudi korporatiboetan eta web orrietan euskara erabiltzen duten merkatariei eta jarduerei 2024 urterako dirulaguntzak arautzeko prozedura martxan jartzeko oinarriak onartu ditu aho batez udalbatzaren urtarrileko osoko bilkurak.
Onartutako proposamenaren baitan, errotuluen kasuan, euskara soilik erabiltzen duten errotuluaren kostuaren %50eko dirulaguntza emango da, gehienez ere 240 euro emanez.
Irudi Korporatiboen kasuan, testua euskara hutsean jarriz gero kostuaren %50ean lagunduko du Udalak, gehienez ere 180 euro emanez. Interesdunak herritarren arreta eta informazio bulegora, Igunera, joan beharko dira eskaerak bideratzera.
Web orriak euskaraz
Web-Orrien kasuan, 2024an %10 handitu egin du Udalak diruz lagundutako kopurua. Euskara hutsean jarri ezkero, kostuaren %60 finantzatuko du udalak, gehienez ere 470 euro arte eta euskara eta beste hizkuntza batean/batzuetan egonez gero, kostuaren %50 emango du Udalak, gehienez ere 380 euro.
Orain arte web-orria euskara hutsean jarri ezkero, %50a finantzatzen zuen Udalak, gehienez ere 450 euroko zenbatekoarekin. Aldiz, euskara eta beste hizkuntza batean/batzuetan egonez gero web-gunea, kostuaren %40 laguntzen zuen, gehienez ere 360 euroko kopuruarekin. Aipatu iaz laguntza hauetaz baliatu ziren 17 onuradun izan zirela udalerrian.
Loinatz jaietako kartelak aukeratzeko lehiaketa
Behin oinarriak onartuta, 2024ko Loinatz jaiak iragartzeko kartelen lehiaketa zabalik egongo da lanak aurkeztu ahal izateko. Urteroko legez, helduen eta ikastetxeetako ikasleen kartelak aukeratzeko lehiaketak izango dira. 16 urtetik gorakoak aurkeztu ahal izango dira helduen lehiaketara eta adin horretatik beherakoak herriko ikastetxeetako gaztetxoak izango dira. Lanak aurkezteko epea martxoaren 17a arte egongo da zabalik.
Urtarrileko osoko bilkuran aztertutako beste gai batzuk honakoak izan dira; TAO ordenantzaren aldaketaren hasierako onespena eta alegazioak aurkezteko epearen irekiera (bozketan aurka PSE -2-, abstenitu ziren EHBildu -5- eta Elkarrekin Podemos -1-, eta alde EAJ -9-).
Tren zerbitzua hobetzeko eskaera mozioa
Irun eta Brinkola arteko ADIFen trenbidea eta Renferen aldiriko zein distantzia erdiko zerbitzuen kalitatea hobetzeko eskaerari buruzko mozioa bozkatu zen osoko bilkuran.
EHBilduren udal taldeak aurkeztutako mozioa aurrera atera zen EHBildu -5-, Elkarrekin Podemos -1- eta EAJren -9- aldeko bozekin. PSE-k -2- aurka bozkatu zuen.
Led argiteria eta gimnasio berria
Beste alde batetik, Gobernu Batzordean Beasaingo herri argiteriko egungo kale-argien ordez LED sistemako argiak jartzeko hornidura eta muntaketa egiteko lanen kontratazioa esleitzeko onespena eman zen Loiola Norte enpresarekin. Lanek Nafarroa Etorbide amaiera eta kiroldegiaren arteko eremua hartuko dute, esleipen prezioa bez-a barne 126.495,54 eurokoa izango da eta lanen egikaritze epea 16 astekoa. Era berean Antzizar kiroldegian “Powerlifting” pisu libreko jarduera-gela gauzatzeko lanak Unebide obras y contratas S.L. enpresari esleitu zaizkio 214.698,77 euroko prezioan (bez-a barne) eta lanen egikaritze epea 15 astekoa izango da.
Gizarte arloari dagokionez, adineko herritarren premiak eta arriskuak antzemateko eta suteak prebenitzeko zerbitzua kontratatzeko baldintza pleguak onartu ziren.
