- Xehetasunak
Igartza Musika Programaren bederatzigarren edizioa aurkeztu dute udal arduradunek. Lehen seihilekoan zuzeneko 10 kontzertu eskainiko dira
Jatorrizko helburuari eutsiz, beasaindarrak eta bereziki gazteak musikara erakarri nahi dira. Kontzertu guztiak irekiak eta doan izango dira
Beasaingo Udalak kultura eta musikaren aldeko apustu sendoaren konpromisoari eutsiz 2024 urteari dagokion Igartza Musika Programaren lehen sei hilabeteko pdf egitaraua (945 KB) ezagutzera eman du Igartzako jauregian egindako aurkezpenean. Beasaindarrak eta bereziki gazteak, musikara erakarri eta gerturatzeko asmoz alor, estilo eta joera anitzeko egitaraua aurkeztu dute Leire Artola alkateak, Mariola Pascual kultura zinegotziak eta programa egituratzeko ardura duten Garazi Zabaleta eta Arantxa Gastesi Loinatz Musika Eskolako arduradunak.
Programa egonkortua
Udal gobernuak martxan jarritako Igartza Musika Programa urtez urte egonkortzen joan den egitasmoa da. Leire Artola alkatearen hitzetan “bederatzigarren edizio honekin, Igartza Musika Programa publikoaren eta musikarien artean izen propioa izatera iritsi da. Erreferentzietako bat bada musikazaleen artean, herrian duen onespena lortzetik, herritik kanpora ere ezaguna izatera pasa da.
Kultura zinegotziaren esanetan, funtsean Igartza Musika Programak bere helburuei eusten die. Musika zaletasuna herritarrei zabaltzeko helburuarekin batera, euskal musikagintzan erreferente direnak zein musikari berriak Beasainen izatea bada udalaren asmoa. Musikenerekin Udalak duen hitzarmen-lankidetza ere beste urte batez berritu izana nabarmendu du. Honi esker, Igartza Musika beka ekitaldian Euskal Herriko goi-mailako musika ikastegiak aukeratutako ikasleek parte hartuko dute. Bi aldeek adostu bezala iazko bekaren irabazleak emanaldia eskainiko dute 2024ko lehenengo ziklo honetan Igartza Musika Programaren baitan eskaintzen diren kontzertuen barruan.
Biola eta piano bikotea hasteko
Jarraian Arantxa Gastesik datozen sei hilabeteetan izango diren kontzertuen berezitasunak azaldu ditu. Urteko lehen kontzertua igande honetan, urtarrilaren 28an izango da arratsaldeko 19:00etan Igartzako jauregian. Batura ziklotik, biola eta piano bikotea izango dira zuzenean. Natalia Tchitch-ek, errusiar jatorriko biolin-jotzailea eta Josu Okiñena piano-jotzaile eta ikertzaileak irekiko dute aurtengo egitaraua.
Natalia Tchitch-ek, bakarka zein lagunduta, jarduera oparoa du nazioarte mailan. Bere etengabeko kezka eta jarduera profesionalaren ondorioz, Europako hainbat hiritan bizi izan da, eta bere ibilbideko etapa bakoitza alderdi artistiko desberdinetara bideratu du. Ganbera-musikarako grina eta dedikazioak Europa mailako jaialdi eta proiektu garrantzitsuenetan aritzera eraman du. 2002tik masterclasseak ematen ditu mundu osoan zehar.
Josu Okiñena piano-jotzaile eta ikertzailea da, Aita Donostiaren obrari buruzko lanengatik Euskal Herriko Unibertsitateak saritu du, eta ez ditu ateak ixten proiektu musikal berriak etengabe bilatzeari. Xuxurlak , Aradak eta Xarmak albumekin, Okiñenak euskal ondare musikalari buruzko ikerketa proiektu bat burutzen ari da azken urteetan berreskuratutako eskuizkribu originalak oinarri hartuta eta mundu osoan zehar nazioarteko bira batekin sustatuz.
“History of Basque Music” argitaratu du Renoko Unibertsitatean (Nevada) eta “Musikaren interpretazioa prozesu artistiko eta zientifiko gisa. Bi dimentsio osagarri” Deustuko unibertsitateko argitaletxearekin.
Kontzertuan, beste konpositoreen artean Hilario Olazaran de Estellaren obrak eskainiko dituzte eta euskal musikaren edukia indartzearren, Aita Donostia eta Jesus Guridirenak ere joko dituzte.
Hamar emanaldi guztira
Bigarren emanaldia, otsailaren 25ean, Igartzako jauregian izango da 19:00etan. Iñar Sastre eta Jagoba Astiazaran musikariek sorturiko Ariñeketan proiektuaren bigarren alearen aurkezpen kontzertua izango da: Zaharrak berri.
Martxoaren 3an, Igartzako jauregian ere, 19:00etan, Kirudat Duoren emanaldia izango da. Markel Pérez Etxarri eta Juan Luis García Díaz perkusio jotzaile gazteek osatutako taldea da. Perkusiozko instrumentuak joz, pieza ezagunak eskainiz publikoa txundituko dute.
Igartza Musika Bekaren azken edizioko irabazleak eskainiko duten kontzertua martxoaren 17an izango da. Egitarauko emanaldi gehienak bezala arratsaldeko 19:00etan izango da. Gradu bekaren irabazlea izan zen Luis Alejandro biolontxelo-jotzailea eta Marta Burgos klarinete espezialitatean Master bekako irabazleak eskainiko dute kontzertua Igartzako jauregian.
Apirilaren 14an, Igartzako jauregian Jon Piris kontrabaxu jotzailea eta Iñar Sastre piano jotzailea musika garaikidearen harmonia eta jazzaren erritmika batzen dituen Pasieran lana aurkeztuko dute. Hau ere arratsaldeko 19:00etan izango da.
Apirilaren 21ean Trintxerpeko Illunbe akordeoi orkestraren kontzertua izango da. Gaur egun Jose Juan Zubillagak zuzentzen du taldea, eta batez beste 30 urte dituzten 15 kidek osatzen dute. Kide batzuk akordeoiaren profesionalak dira dagoeneko. Bere kontzertuen egitaraua askotarikoa da, obra klasikoak, filmetako abestiak, edota musika tradizionala barne.
Maiatza oparoa
Maiatzaren hasieran, Musika Eskolak antolatu duen MUSIKA GARAIA proiektu berria aurkeztuko da. Bertan, Hitzaldiak, Musika Tailerrak, Kontzertuak izango dira, besteak beste “Sorotan Bele gogoan” izango da, Musika Eskolako Banda eta Abesbatzaren parte-hartzearekin. Ondoren Loinatz jaiak izango dira, bete betean, beti bezala proposamenez beteta
Eta hilaren amaieran Igartza Musika Programako 3 kontzertu: maiatzaren 25ean, Loinazko San Martinen Basilikan 19:00etan, Aitor Garitanoren zuzendaritzapean Alboka taldearekin batera, Loinatz abesbatzaren kontzertua eskainiko da.
Maiatzaren 26an, Aitor Urquiza burlatarrak eta Iker Alvarez bilbotarrak Harribitxi duo aurkeztuko dute. Sorkuntza berriko musika izango da txistulari bikoteak eskainiko duena. Kontzertua gaueko 19:00etan hasiko da Igartzako jauregian.
Tenpora deituriko boskote gipuzkoarrak “Ama” estudioko bere laugarren lana aurkeztuko du maiatzaren 31 Igartzako jauregian 20:00etan. Hasier Oleaga (bateria), Itsaso Etxebeste (baxua), Beñat Barandiaran (gitarra), Juantxo Zeberio Etxetxipia (teklatuak) eta Elene Arandiak (ahotsa) osatzen duten taldeak, Aitor Etxebarria musikari eta konpositoreak ekoiztutako lanean murgiltzeko aukera eskainiko du beste hainbat abestien artean.
Lehen seihilekorako antolatutako azken kontzertua ekainaren 6an izango da Erauskin plazan 20:00etan. 1978an Txomin Artolak kaleratutako Belar Hostoak diskoaren berrinterpretazioa egin zuen 2022ko martxoan, lagun talde batek. Jon Gurrutxagak jarri zien ahotsa artista hondarribiarraren abestiei, Antxon Sarasua, Andoni Etxebeste, Dani Venegas eta Urbil Artolak lagunduta. Artolaren abestiek kutsu modernoagoa eta gaurkotuagoa hartzen dute, pop eta folk estiloak bluesari eta rockari egindako keinuekin nahastuz eta hori eskaintzera etorriko dira Beasainera.
Musika ardatz hartuta Beasain kalitatezko eta maila goreneko emankizunen kokaleku bihurtzeko ahalegina lortzen ari dela erantsi dute arduradunek. Jendea kontzertuetara etortzeko gonbitea ere luzatu dute. Emanaldi guztiak irekiak eta doan izango dira aforoa osatu arte dagokion lekuan.
- Xehetasunak
Juan Bautista Usabiaga Etxeberriak 101. urtebetetzea du gaur. Leire Artola alkatea eta Mariola Pascual ongizate arloko zinegotziaren bisita jaso eta beasaindar guztien izenean zoriondu eta lore sorta oparitu diote. Familiaz inguraturik ospatu du gaurko eguna otordu goxoaren bueltan. Zorionak Juan Bautista!
- Xehetasunak
Azenariozko bizkotxoa nola egin erakutsiko da tailerraren orduan
2023ko lehenengo azoka berezia urtarrilaren 13an dator. Errege egunak baldintzatuta urtarrileko bigarren larunbatean izango da urteko lehen azokak. Negu-giro betean, sasoi honetako barazkiak izango dira nagusi azokako postuetan, besteak beste, azalorea, brokolia, azelgak, zizerbak, bruxelar aza, aza, porrua eta baratxuri freskoa.
Barazkiez gain, beste produktu batzuek saltzen dituzten postuak izango dira Loinazko San Martin plazaren azpian: eztia, ogia, loreak eta landareak, tartak eta gailetak, gazta eta haziak. Beraz, poltsa bete produktuz etxera joateko moduko azoka izango da. Artisau erara egindako poltsak, lepokoak, umeentzako adur-zapiak eta abar saltzen dituen postua ere izango da. Tailerraren orduan, Susanne Klemmek, azenariozko bizkotxoak egiten erakutsiko du.
Egitaraua:
- 10:00 Bertako produktuen azokaren hasiera.
- 11:30 Azenariozko bizkotxoak egiten ikasteko tailerra azokako ekoizlea den Susanne Klemmen eskutik.
- 12:00 Loinatz Musika Eskolako trikitilariek eta pandero joleek azoka girotuko dute.
- 13:30 Azokako produktuez osatutako 2 saskiren zozketa azokan erosketak egindakoen artean.
- 14:00 Bertako produktuen azokaren amaiera.
Bertakoa eta garaian garaikoa bultzatzea
Hileko lehen larunbateko azoka berezia, Udal gobernuak martxan jarritako egitasmoa da eta honen helburua, bertako ekoizleen eta baserritarren lana balioan jarri eta garaian garaiko produktuen kontsumoa areagotzea ez ezik, kontsumitzaileak azokara erakartzea ere bada. Horretarako azoka dinamizatzeko ekintza ezberdinez osatutako egitaraua antolatzen da hilero. Bertako eta sasoiko produktuak kontsumitzeak dakartzan onurak jakinarazi eta sustatzea ere bada Udalaren asmoa, osasunaren eta bizi kalitatearen alde eginez.
- Xehetasunak
Lau ibilgailu hornitzeko gaitasuna izango duten bi puntu instalatzeko lizitazioa abian da
Ibilgailuko 22kW-ko errekarga potentziarekin, kargaren %75a bi ordutan egin ahal izango da bateriaren ezaugarrien arabera
2023-2027 legealdian errekarga sarea beste udalerriko gune batzuetara zabaltzeko asmoa azaldu du Udalak
Udalaren elektro mugikortasun estrategiaren lehen mugarria Gernika pasealekuan ezarri zen 2023ko martxoan, 50 kW-ko potentziadun lehen errekarga puntu bikoitzarekin. Hilabete batzuen ondoren, zerbitzua egonkortu egin dela ikusita eta mugikortasun elektrikoa sustatzeko helburu anbiziosoenak aintzakotzat hartuta, Udalak pausoak ematen jarraitzen du Beasainen errekarga sare sendo bat osatzeko.
Honela bada, Gipuzkoa plazako aparkalekuan kokatuko du Beasainen izango den ibilgailu elektrikoentzako bigarren errekarga gunea.
Ezaugarri teknikoak eta kokapena
Udal Gobernu Batzordeak onartutako pleguen arabera, 44 kW potentziadun bi errekarga puntu bikoitz instalatuko dira, ibilgailuko 22 kW hornidura potentzia eskaintzeko. Jasotzen dituen Mennekes erako konexio eta ezaugarriei esker, Europako edozein ibilgailu elektriko edo hibridorekin bateragarria izango da. Ibilgailuaren bateria eta ezaugarrien arabera, 22 kW-rainoko hartuneen bitartez kargaren %75a bi ordutan egin ahal izango da.
Gernikako pasealekuan dagoen errekarga puntuak bezala, ordainketa kudeatzeko TFT pantaila digital bat izango du eta APP bitartez egiteko aukera izateaz gain, nahi duenak kontaktu gabeko TPV sistema erabili ahal izango du kreditu txartel bitartez ordainketa zuzenean egiteko.
Kokapen zehatzari dagokionez, errekarga puntua Zaldizurreta kaleko 19 zenbakiko eraikinaren ondoko bateriako aparkalekuetan egongo da. Loinatz jaietan Gipuzkoa Plazak duen erabilera kontuan izanda, ez da bateragarria errekarga puntuak erdialdean kokatzea eta ondorioz, aukera honen alde egin du Udalak.
Klima aldaketari aurre egin
Mugikortasunaren deskarbonizazioa klima krisiari aurre egiteko tresna nagusietako bat izateaz gain, Europa mailan ibilgailu elektrikoa industria apostu estrategikotzat eman da. Honen ondorioz, hainbat lege eguneratu eta berriak sortu dira. Klima-aldaketari eta energia-trantsizioari buruzko maiatzaren 20ko 7/2021 Legea eta ondotik etorri zen Abenduaren 21eko 29/2021 Errege Lege Dekretua dire horren adibide.
Azken honek, elektromugikortasunerako transizioa ahalbidetu nahi duen gune publiko eta eraikinetako gutxieneko ibilgailu errekarga sarea zehazten du. Horrela, errepide edo eraikinei atxikituta ez dauden aparkaleku-poltsa publikoetan 40 plazako, errekarga puntu bat instalatu beharko da eta administrazioaren eraikin publiko berrietako aparkalekuetan, proportzio hau 20 plazako errekarga puntu batera igotzen da. Gipuzkoa Plazan instalatuko diren 4 errekarga plazekin, aparkaleku honen barneko 145 plazetako 1-40 proportziodun gutxieneko eskaintza beteko litzateke.
Datozen hamarkadetan egun konbustio teknologietan oinarritzen den automozioaren industriaren trantsizioa osatu nahi da eta bide batez, krisi-klimatikoaren erronkari aurre egin mugikortasuna deskarbonizatuz. Izan ere, Gipuzkoaren kasuan adibidez, urtero isurtzen ditugun berotegi efektudun gasen %43,3 mugikortasun sektoretik dator, Foru Aldundiaren 2020ko datuen arabera.
Beasaindarroi dagokigunez, industriak duen isurpen inpaktua alde batera uzten badugu, gure egunerokoan sortzen ditugun berotegi efektuko gasen %73 mugikortasunarekin lotuta dago, hein handi batean konbustio-ibilgailu pribatuaren gehiegizko erabileraren ondorioz. Horrela isladatu zen Udalak landutako Klima Aldaketa eta Energia Jasangarrirako Planaren diagnosian.
Udalaren konpromisoa
Instalakuntza berri hau, mugikortasun jasangarriaren aldeko beste ekimen batzuei batzen da, autoa partekatzeko ParteCar App-a, bizikleten aparkaleku sarea hobetzeko neurriei edota Beasaingo Hiri Mugikortasun Jasangarrirako Planari, alegia.
Elektromugikortasunaren onuren artean, konbustiodun autoak ibilgailu elektrikoengatik ordezkatzeak CO2 emisioak murriztea dakar, airearen kalitatea hobetuz eta osasunean positiboki eraginez.
Udal gobernuak tinko mantentzen du bere konpromisoa ingurugiroaren babesaren alde eta klima aldaketaren aurkako borrokan.
