- Xehetasunak
Beasaingo Udalak eta Cita Alzheimer Fundazioak elkarlanean abiarazi dute ekimena herritarren artean zahartzaro aktiboa sustatzeko helburuarekin
Programa honen bidez funtzio kognitiboak estimulatu eta horiek indartzeko gakoak lortuko dira
Programa aurkezteko hitzaldia emango da urtarrilaren 11n, 11:00tan, Usurbe Antzokian. 60 urtetik gorako beasaindar guztiak gonbidatuak izan dira
Duela sei urtez geroztik, Beasaingo Udalak CITA-alzheimer Fundazioarekin duen lankidetzari esker, osasun kognitiboa zaintzeko eginkizunean jarduten dute. Oraingo honetan beste behin ere, bat egin dute herritarren ongizatean eta osasunean elkarlanean aritzeko. Cita Alzheimer Fundazioa, alzheimerra ikertzen eta prebenitzen aritzen da eta “Osasun kongnitiboa zaintzeko Exercita Programa” berriz ere abian jarri du Udalarekin batera.
Lehen edizioak izan zuen arrakastaren ondotik bigarren edizio honi buruz informatzeko, urtarrilaren 11n, goizeko 11:00etan Usurbe Antzokian, hitzaldi bat eskainiko da programaren xehetasun guztian azaltzeko. Horretarako, gutun bidez 60 urtetik gorako beasaindar guztiei gonbidapena bidali zaie etxera.
Exercita programa
Helburuko pertsonak, kognitiboki osasuntsuak edo memoria arazo arinak dituztenak dira. Guztiei eskainiko zaie estimulazio kognitiboko programa bat egiteko aukera. Sei hilabeteko iraupena du programak eta lau modalitate ezberdin eskainiko dira pertsona bakoitzaren egoerara hobekien egokitzeko. Hauek izango dira:
- ExerCita modalitate klasikoa: estimulazio kognitiboko liburuko jarduerak bakarrik egingo dira etxetik, sei hilabetez, astean hiru saio eginez.
- ExerCita Plus Presentzialaren modalitatea: liburua eta tailer presentzial bat egingo dira hilero Beasainen, programak irauten dituen sei hilabeteetan (sei saio).
- ExerCita Plus on line modalitatean, dinamika modalitate presentzialaren berdina izango da baina bideo-dei bidez egingo da.
- ExerCita “a la carta” (edo nahieran) modalitatean, liburuak egiteaz gain, saio bakoitzeko gaiei dagozkien edukiak plataforma digital batera igoko dira, aurkezpenekin eta laburpen-bideoekin.
Onurak
Exercita programak funtzio kognitiboei eragiten dien onuren artean hauek aurkitzen dira: funtzio kognitiboak landu, indartu eta mantentzen ditu. Zer diren ulertu eta gure egunerokotasunean bakoitzaren garrantziaz jabetzen gaitu. Profesionalen jarraipenarekin, zalantzak partekatu eta argituko dira.
Besteak beste, programaren helburu nagusiak hauek dira:
- Egunerokotasunean, ohitura kognitibo onak ezartzea.
- Zahartze aktibo eta osasungarriaren aldeko osasun kognitiboko ohiturak ezartzearen garrantziari buruzko gizarte-kontzientzia areagotzen laguntzea.
- Gaitasun kognitiboak indartzea eta zaintzea.
- Gizarte-harremanak sustatzea.
Informazio gehiagorako eta parte hartzeko, sartu ondorengo hestekan
Edo idatzi Helbide elektroniko hau spam roboten kontra babestuta dago. JavaScript aktibatuta eduki behar duzu hau ikusteko. helbidera edo deitu 943 021 792 zenbakira.
- Xehetasunak
Gogotsu hartu ditu etxean Emilianak Leire Artola Beasaingo alkatea eta Mariola Pascual ongizate arloko zinegotzia. Izan ere urtero legez bere urtebetetzearekin ematen diote amaiera Eguberriari. Lore sortarekin batera beasaindar guztien zorion agurra jaso du udal ordezkarien eskutik. Jarrai dezazula horrelaxe eta bejondeizula Emiliana.
- Xehetasunak
Gizabidezko jokaerak zaintzeko ardura izango dute eta urtarrilaren 8tik aurrera lanean izango dira udalerriko kaleetan
Gabeziak dauden arloak zainduko dituzte, hala nola, txakur gorotzak, patinete eta oinezkoen arteko elkarbizitza, hiri altzarien zaintza, hormen apaindura edo edukiontzien erabilera zuzena
Elkarbizitza hobea eta errespetuzko jokabideak sustatzeko helburuarekin, Beasaingo Udalak azken garaian udalerrian ematen diren gizabidezko jokaera okerrak zuzentzeko ekimen berria jarriko du abian datorren astetik aurrera. Helburua, bizikidetza hobetzea eta herritarrentzako udalerri atseginago bat sustatzea da, beti ere informazio, sentsibilizazio eta ohartarazpen lanak eginez.
Enplegu sustapenerako programa baliatuz, bi lanpostu berri sortu ditu Udalak eta bi bizikidetza agente urtarrilaren 8tik aurrera izango dira lanean 6 hilabetez. Goiz eta arratsalde izango dira udalerriko kaleetan zaintza lanetan eta beraien eskumena informatiboa eta pedagogikoa izango da.
Gabeziak dauden arloak zaindu
Bizikidetza agenteak edo agente zibikoak, jarrera zibiko edo gizabidezkoen informazio, sentsibilizazio eta sustapen lanak egiten ditu, herritarren artean bizikidetza eta errespetu oneko ekintzak sustatzeko, bai eta hiriko ondasun publiko eta pribatuen erabilera egokia sustatzeko ere.
Bere eginkizuna, herritarrei indarrean dauden hiri-arauen arabera dituzten eskubideak eta betebeharrak erabiltzen laguntzea izango da. Funtzio hori bide garbiketarekin eta hondakinen kudeaketarekin, txakurren jabetzarekin, ibilgailuen mugikortasunarekin edo horma margoketekin lotutako hainbat eremutan garatzen da. Pertsonen zalantza, kexa eta iradokizunei ere erantzuteko daude, eta gizalegezko kanpainen antolaketan parte hartzen dute. Aldi berean, atzemandako errespetu gutxiko ekintzak jakinarazi eta deskribatuko dituzte.
Azken finean, bizikidetza ikuspegitik gabeziak dauden arloak zainduko dituzte. Besteak beste: txakur gorotzak eta txakur askeak, patinete eta bizikleta eta oinezkoen arteko bizikidetza, hiri altzarien babesa, kaleko ormen apaindura eta zabor puntuen erabilera zuzena (zaborra dagokion edukiontzian eta dagokion ordutegian uzteko).
Informazioa eta laguntza
Espazio eta zerbitzu publikoen erabiltzaileen artean (garraio publikoak, parkeak eta lorategiak, merkataritza kaleak, etab.) gizalegea zabaltzeko eta sustatzeko eginkizuna ere izango dute.
Gizabidezko kultura (zibikoa) zabaltzeko informazio lana egingo dute, bide publikoan herritarren eskubideak eta betebeharrak zuzen erabil daitezen. Ahoz ohartaraziko dituzte gizalegearen aurkako jokabideak, batzuetan gatazkatsuak, eta harremanetan jarriko dira bere eremu geografikoaren barruan jarduten duten beste segurtasun zerbitzu publiko edo pribatuekin.
Interes praktikoko informazioa ere emango dute (helbideak, garraio publikoen egoera, telefono publikoak) udalerrian kokatutako baliabideei, ekipamenduei, instalazioei eta bestelako erakunde edo erakundeei buruz.
Aire zabaleko merkataritza guneetan edo beste azalera itxi batzuetan eskaintzen diren zerbitzuei buruzko informazioa emateaz gain, gune horietako ekipamendu publikoen erabilera zuzena eta mantentze lanak zainduko dituzte. Erabilera publikoko instalazioak eta ekipamenduak hobetzeko eta konpontzeko lanak -betiere konponketa teknikoki konplexua behar ez bada- edo horien berri emango dute dagokien administrazioei, horiek konpondu edo ordezka ditzaten.
Helburua da Beasain hiri atseginagoa eta segurtasun eta elkarrizketa sentsazio handiagokoa bihurtzea, bai herritarrentzat, bai bisitatzen gaituztenentzat.
- Xehetasunak
Loinatz Futbol Zelaiko harmailetako estalkian plaka fotovoltaikoen instalazioa jartzeko kontratazioa burutu da
Herri argiteria %100 LED teknologiara moldatzeko 2023-2027 legealdiko lehen fasearen kontratazioa martxan jarri da
Udal gobernuak, ingurumenaren babesa bultzatu eta klima aldaketari aurre egiteko aurreikusitako neurriekin aurrera jarraitzen du. Honela, aurtengo udal aurrekontu orokorrean aurreikusi bezala, Beasaingo udal eraikinen energia beharrei aurre egiteko eta udalerriko jasangarritasun energetikoan aurrera pausoak emateko, Loinatz Udal Futbol Zelaiko harmailetako estalkian autokontsumorako instalazio fotovoltaikoa eraikitzeko lanak kontratatzeko onespena eman du.
Gisa honetako lehen instalakuntza Antzizar kiroldegiko estalkian kokatu zen duela urte bete pasatxo. Hura izan bazen lehena, orain gauzatzera doanak beste udal eraikinen autokontsumorako beharrak asetzeko urrats berri bat ematera dator.
Loinatz Udal Futbol Zelaiko harmailetako estalkian kokatuko den instalakuntza aldiz autokontsumo-kolektibo formatuan egingo da. Eredu honen arabera, 2 km-ko erradioan aurkitzen diren Udal eraikinak hornitu ahal izango ditu momentuko kontsumo beharren arabera. Esku hartze honekin, Udalak egun dituen argi-indar kontsumo beharrak asetuta geratuko lirateke.
Autokontsumoa helburu
Loinatz futbol zelaikoa 120 kW-ko potentziadun eguzki plaka fotovoltaikoen instalazioa izango da. Plakek jasoko duten eguzki energiaren bitartez, urtero 98.105 kWh energia ekoiztea espero da. Udal eraikin guztiek (kiroldegia ezik, bere instalazio propia badu eta) urtean 275.352 kWh kontsumitzen dute. Honela bada, instalazio berriarekin kopuru horren %35 inguru ekoiztea lortuko da. Aldi berean, urteko 45.367 kg CO2 atmosferara ez isurtzea lortuko da, alegia urtean 5.040 zuhaitzek xurgatzen duten CO2 kantitatea.
Instalakuntzaren aurreikusitako bizi iraupena 25 urtekoa izanda, guztira 1.134.000 CO2 Kg atmosferara ez isurtzea lortuko da epealdi horretan. Plaka fotovoltaikoaren instalazioaren inbertsioa 86.372,37 eurokoa izango da eta dirulaguntzarik jasoko ez balitz ere, egungo elektrizitate kostuen arabera, sei urtetan inbertsioa amortizatuko litzateke. Lanak Leycolan S.A.L. enpresari esleitu zaizkio eta egikaritze epea 12 astekoa izatea espero da.
Kale argiak LED sistemara
Azken Udal Gobernuaren Batzordeak, Beasaingo kale-argiak LED teknologiara aldatzen jarraitzeko beste kopuru sorta baten kontratazioa martxan jartzea onartu zuen. Helburua, legealdi bukaerarako aldatzeke geratzen den argiteria guztia LED sistemara egokitzea da eta horretarako, 2023-2027 legealdiko lehen kontratazio fase hau jarri da martxan.
Argi berriak instalatuko diren eremua Nafarroa Etorbidea 22tik Antzizar kiroldegirainokoa da. Proiektua lantzeko garaian egun dauden argiztapen gabeziak identifikatu eta simulazio bat egin da eraginkortasun energetikoa eta argiztapen maila egokiak uztartuko direla bermatzeko. Halaber, arreta berezia jarri da zebra bide eta errepide puntu sentikorretan, bide segurtasun baldintzak ere hobetu daitezen.
Udala urteak daramatza kontsumo urriko sistema berri honetara udalerriko argiteria aldatzen. Oraingoan, 172.416,43 €-ko inbertsioa egitea aurreikusten da eta 16 astetan egikarituko litzateke lan hau.
Jasangarritasun ikuspegitik, LED argiteriak ingurumenari kalte gutxiago eragiteaz gain, eraginkortasun energetikoa handiagoa du, bero gutxiago eragiten dutelako eta hondakin toxikoei dagokienez eragin txikiagoa du, teknologia zaharragoekin alderatuta.
