- Xehetasunak
Ikasturteko ekintza planean dauden estilo, formatu, edota adin desberdinetako jarduerak bildu dituzte egitarau batean
Ikusgarritasuna emanez, Musika Eskola herritarrei hurbiltzea da helburua adin guztietako ikasleak erakartzeko
Datorren ikasturterako ikasle berrientzako matrikulazio epea maiatzaren 2tik 10era egongo da irekita
Beasaingo Loinatz Udal Musika Eskolak datorren ikasturterako ikasle berrientzako matrikulazio epea ireki ohi du garai honetan eta orain arte ez bezala izenburu eta egitarau batean bildu ditu helburu horretara zuzenduta antolatzen dituen ekitaldiak.
Honela bada, Udal arduradunek eta Musika Eskolako zuzendaritzak agerraldia eskaini dute honen berri zehatza emateko. Mariola Pascual, kultura zinegotzia, Arantxa Gastesi, Loinatz Udal Musika Eskolako zuzendaria eta Xabier Zeberio, biolin irakaslea izan dira “Musika garaia” egitarauak biltzen dituen ekimenen xehetasunak ematen.
Mariola Pascualek, Loinatz Udal Musika Eskolak Beasaingo komunitatean betetzen duen paper garrantzitsua nabarmendu du. “Hezkuntza-sisteman duen garrantzia handia da. Baina ez da bakarrik kultura eta artea sustatzen duen eragilea, komunitateko elkartasuna ere bultzatzen du. Musika beasaindarren nortasunean txertatua dago eta Beasaingo kultura, tradizioan eta elkartegintza-sarean Loinatz Udal Musika Eskolak duen eragina ezin da ezbaian jarri” adierazi du. Horregatik ekimen honek Musika Eskolaren jarduna herritarrei hurbiltzen jarraitzea du helburu, eskolaren ateak irekiz eta ikasle berriak erakarriz.
Arantxa Gastesik bere aldetik, egitarauaren berri zehatza eman du, era berean gogoratuz, hurrengo ikasturterako ikasle berrientzako matrikulazio epea maiatzaren 2tik 10era luzatuko dela. Informazioa Musika Eskolan edo bere web orriaren bidez eskainiko da. 5 urtetik aurrera, adin mugarik gabe, edonor izan daiteke musika ikasle.
Ate irekiak Musika Eskola ezagutzeko
Gastesik azaldu duenez, Musika Eskolako ikasturteko ekintzen planak formatu, adin edota estilo desberdinetako jarduerak izan ohi ditu. “Aurten aste berean barneratu nahi izan dira aurretik antolatzen diren jarduera horietako batzuk proposamen berriekin, eta aste horri “Musika garaia” deitu zaio”.
Hala ere, gaurtik hasita datorren aste osoan, Loinatz Udal Musika Eskolak bere ateak irekiko ditu herritarrek ikusi eta ezagutu dezaten. Xabier Zeberiok azaldu du, ate irekietako saioetan, flauta, pianoa, perkusioa, akordeoia, klarinetea, trikitixa eta panderoa bezalako instrumentuen saioak ikusteko aukera izango da aldez aurretik jarritako orduetan.
Sorotan Belek itxiko du egitaraua
Egitarauari dagokionez, apirilaren 29tik maiatzaren 4ra, sei egunetan musikarekin lotura estua duten bost ekitaldi antolatu dira.
Apirilaren 29an: Makey Makey. 7-10 urte bitarteko haurrei zuzendutako Musika Tailerra. Udaletxeko batzar aretoan 17:00etan. Musika-tresna edo instrumentuak egingo dira banana, patata edo azenarioekin eta gorputza bera piano, bateria edo beste edozein instrumentu bihurtuko dituzte. Gaitasun teknologikoak lantzeko modu bat da, ikasgelan jarduerak garatzeko, aldi berean, musika-sormena lantzeko. Plaza mugatuak daude eta izenematea Beasaingo Udal web gunean egin ahal izango da.
Apirilaren 30ean: Hitzaldia: musika, kognitiar kaltearen prebenzioan. Xabier Lizasok eskainiko du Igartzako jauregian 19:00etan. Xabier Lizaso pianojole eta ikerlariak, azken urteotan izan duen garapena dela eta, musikaren ariketa eta osasuna uztartzen dituen eremu bat sortu du, neuro-gaitzei aurre egiteko.
Maiatzaren 2an: Txikimusik. Musika Eskolako 5-7 urte bitarteko ikasleen emanaldia. Plaza azpian 17:15ean. Musika Eskolako Tailerreko eta Hastapeneko taldeek hainbat abesti aurkeztuko dituzte, era desberdinetan jorratuak, hau da, abestuz eta dantzatuz perkusio txikiko instrumentuen laguntzarekin; tuboak, kanpaiak eta abar.
Egun berean Trakamatrakaren emanaldia eta Tailerra. Plazan edo plaza azpian, 18:00etan. Partaidetza librea da. Birziklatutako edo etxean eta ohiko moduan erabiltzen diren materialak erabiliz, musika-tresnak egingo dituzte.
Maiatzaren 3an: “Musika Plazan” emanaldia. Plazan edo Gernika pasealekuko Pilotalekuan 19:00etan. Musika Eskolako Talde handiak izango dira: Banda, Perkusio taldea, Trikitilariak, Koral taldea eta Narama abesbatza.
Maiatzaren 4an: kontzertua “Sorotan Bele Gogoan”. Plazan edo Gernika pasealekuko Pilotalekuan 19:00etan. Sorotan Belek eskaintzen duen emanaldi indartsua da, arrakasta handia izan duena hasi zirenetik. Musika Eskolako Banda, Koral taldea eta Narama abesbatza arituko dira beraiekin batera oholtzan. Emanali honek itxiko du egitarau.
- Xehetasunak
Apirilaren 29an hasiko dira eta lau fase ezberdinetan burutuko dira 18 hilabetez
Egoilarren etxebizitza, saltoki eta garajeetarako sarrera-irteerak eta zamalanguneen erabilera ahalbidetuko da
Material eta makineriaren mugimendua antzematen hasia da San Inazio kale inguruan. Izan ere, apirilaren 29an hasiko dira San Inazio eta Esteban Lasa kaleak osatzen duten ardatza eraberritzeko lanak. Bertako bizilagun eta merkatariekin egindako bileretan emandako informazioan adierazi bezala, fase ezberdinetan burutuko dira lanak, eremuz-eremu ahalik eta azkarren amaitu eta eragozpenak murrizteko. Begi bistakoak izango diren zoladura, lorazaintza, asfaltaketa eta argiteria lanez gain, kaleen oinarrian lan garrantzitsuak egingo dira, argi-indar, gas, ur hornidura eta saneamendu sarea berrituz.
Lanak lau fase ezberdinetan
Orotara 18 hilabete iraungo dute lanek aurre ikusitakoaren arabera. Baina fase eta zati ezberdinetan burutuz joango dira. Bi kale hauen luzera, atal ezberdinetan banatu da bertako bizilagunen joan-etorria eta ibilgailuen zirkulazioa ez eteteko (salbuespen oso zehatzetan izan ezik lanek hala behartuta).
Honela bada lau fase nagusi egongo dira; lehen biak San Inazio kalearen esku hartzeari dagozkionak eta ondorengo biak Esteban Lasari. Aldi berean, fase bakoitza bi azpi-fasetan banatuko da, kalea erditik banatuko dutenak. Horrela, albo batean lanak dirauten bitartean, egoilarren eta zamalanak egitera datozen ibilgailuen joan etorria ahalbidetuko da, baita autobus zerbitzua. Bi autobus geltokiak bere lekuan mantenduko dira.
San Inaziotik hasi
Lanak San Inazio kalearen mendebaldeko muturrean hasiko dira eta 13-19 zenbakien arteko tartea hartuko dute alde batean eta bestean 14 zenbakiari eta La Salle ikastetxearen aldeari dagokiona. San Inazio kalea amaitzean, Esteban Lasa kalean jarraituko dute lanek. Hemen ekialdeko muturretik hasiko dira, 6 zenbakiaren parean, non norabide bikoitza berreskuratuko den ibilgailuen trafikorako. Hortik, Esteban Lasa kalearen ekialdeko muturreraino jarraituko dute lanek 1 zenbakira iritsi arte.
Bidegurutzeak eta trafiko aldaketa
Bi bidegurutzetan ere aldaketak egingo dira. Andra Mari kalearekin eta Martina Maiz kalearekin gurutzatzen direnak. Pertsonen segurtasuna helburu izanik, espaloiak eremu handiago izango dute. Era berean San Inazio kalearen erdian egun aurkitzen den zebra bidea dagoen tokian, errepideak sigi saga itsura hartuko du eta oinezkoek zeharkatzen dute zebra bideari altuera emango zaio ibilgailuen abiadura moteltzeko.
Lan guzti hauekin lotuta, lau faseak amaitzen direnean San Inazio kalea zeharkatzen duten ibilgailuei eragingo dien trafikoan aldaketa emango da. Egun, San Inazio kaletik Zaldizurretako biribilgunera irteteko derrigorrezkoa da Mendeurren kaleraino iristea.
Aldaketarekin, Erauskin kaleko 2 eta 9 zenbakien tarteak egun duen norabidea aldatuko da eta jaitsi ordez igo egingo da. Honekin batera, Martina Maiz kalearen norantza aldatu egingo da, eliza paretik pasa ondoren Esteban Lasara jaitsiz eta Ordiziruntz edota Zaldizurretako biribilguneruntz iristea ahalbidetuz. Halaber, Igartetxe kaleko erikina inguratzen duen errepidearen norantza ere aldatu egingo da. Moldaketa hauei esker, San Inaziotik-Esteban Lasatik irtetzeko bidea laburtuko da eta ondorioz trafikoak eragiten duen CO2 isurpenak murriztuko dira eta bide segurtasuna handituko da.
Pertsonak lehenetsi
San Inazio-Estaben Lasa, denda, saltoki, ikastetxe eta zerbitzu ugari biltzen dituen ardatza da eta pertsonen topaleku eta joan-etorrirako eremua da. Bertan ez da esku hartze sakonik burutu azken 60 urtetan eta azaleko konponketak soilik jaso dituenez, agerian gelditu dira urteen poderioz pairatzen dituen gabeziak.
Hargatik, udalerriko beste hainbat kaleetan egin den bezala, ardatz hau egungo behar eta baldintzetara egokituko da, oinezkoei egokitutako espazioak lehenetsiz eta bertako merkataritza eta saltokiak indartzeko konpromisoarekin jarraituz. Bide segurtasuna hobetzeaz gain lurpeko lanei esker zerbitzu eta ur-saneamendurako sareak berrituko dira.
Obrei buruzko informazioa, infografia eta irudiak esteka hau jarraituz daude ikusgai.
- Xehetasunak
Azken urteetan gertatzen ari zen jende pilaketak behartuta, dantzan parte hartzen dutenen kopurua mugatzeko erabakia hartu du antolakuntza taldeak
Oholtza gainean 40 pertsona izango dira eta honen inguruan 300 gehienez. Dantzan irtengo direnek ekitaldirako espreski sortu den zapia eramango dute lepoan eta entseguetan banatuko da
1990tik Loinatz jaiei hasiera ematen dien Mariren jaitsierak aldaketak izango ditu bere antolakuntzan. Batik bat oholtza gainean eta honen inguruan dantza egin behar dutenei eragingo die. Hala adierazi dute agerraldi bidez Beasaingo Udaleko alkateak Leire Artolak eta Mariren jaitsieran parte hartzen duten antolakuntza taldeko eta elkarte ezberdinetako ordezkariek udaletxean egin duten agerraldian.
Alkatearen esanetan, Mariren jaitsierak 34 urte beteko ditu aurten eta ezbairik gabe ekitaldi berezi, kuttun, arrakastatsu eta jendetsuena bilakatu da. Jaietan errotu den ekitaldi honek festaren lehertzea dakar, dantza, musika, antzerkia eta tradizioa biltzen ditu ikuskizun bakarrean. Beasaindarrentzat eta bereziki gazteenentzat, hutsik egin ezin daiteken hitzordua da. Antolatzaile eta partaideen lana aitortu eta balioan jarrita, alde on guztiez gain beste batzuk ez hain onak ere ekarri dituela berarekin aipatu du eta horiek zuzentzeko neurri berriak aurkeztera datozela azaldu du.
Kopuru mugatua
Ekitaldia koordinatzeaz arduratzen den Arrano Kultur Elkartearen izenean, Jose Ramon Iraolak azken urteetan izan diren zailtasunak azaldu ditu. “Pertsona kopurua gehiegizkoa zela ohartuta geunden, bai oholtzan bai oholtzaren inguruan dantza egiten zutenak. Oholtza gainekoa 40ra mugatu dugu baina oholtzaren inguruan dantza egiten zutenen kopurua ez da jaitsi. Hori nolabait mugatzeko beharrak eraginda bildu gara pare bat aldiz eta aurten neurri batzuk hartuko ditugu froga gisa” aipatu du. Segurtasuna eta kalitatea dira irizpide nagusiak Iraolaren iritziz eta horik bermatu behar dira erorikoak edo sua piztean ezbeharrak gerta ez ditezen.
Bi koloretako zapiak parte hartzaileentzat
Aurtzaka dantza taldeko Naiara Azurmendik hartuko diren neurrien berri eman du. Oholtza gainean zein honen inguruan dantza egingo dutenek kolore jakin bateko zapiak eramango dituzte, aipatu du. Zapi horiek lortzeko antolatu diren entseguetara etortzea beharrezkoa izango da.
Entseguak egun hauetan izango dira: apirilaren 26an eta maiatzaren 3an 19:00etan Antzizar kiroldegian eta egunean bertan maiatzaren 10ean 20:00etan plazan. Oholtza gainean 2007. urtean jaiotako 40 dantzarik dantza egingo dute eta oholtzaren inguruan 300 dantzariei banatuko zaie zapia. Zapirik lortzen ez dutenak, Kale Nagusian, plaza ondoan dantza egiteko aukera izango dute.
Neurri hauekin, dantzaren kalitatea hobetzeaz gain, plazan sartuko diren dantzariak ere kontrolpean edukitzea espero da. Honela, ikuskizunaren kalitatea eta ikusgarritasuna hobetu eta dizdira mantentzea espero da.
Loinatz abesbatzako Belen Callejok eta Antzerki taldeko Anita Alonsok, gaineratu dute oholtza inguruan sortzen den istillua eta zarata gutxitzea espero dute. Honela, abesbatza kantuan aritzen denean eta Marik pregoia zabaltzeko unean argi entzun dadin lagunduko du.
- Xehetasunak
Beasain, Ordizia eta Lazkaoko Udalak 2010az geroztik urtero elkarrekin antolatzen duten kanpainari esker handituz doa euskaraz aurkezten diren aitorpenen ehunekoa
2023ko Errenta aitorpena egiteko garaia iritsi zaigu. Hori dela eta, herritarrek aitorpena euskaraz egin dezaten animatzeko Errenta aitorpena euskaraz, Ogasunarekin euskaraz! kanpaina antolatu dugu Beasaingo, Lazkaoko eta Ordiziako Udalok elkarlanean.
Aurtengo kanpainaren aurkezpenean, Adur Ezenarro, Ordiziako alkatea, Mariola Pascual, Beasaingo Udaleko Herritarrak arloko burua eta Kepa Zubiarrain, Lazkaoko alkatea izan dira xehetasunak ematen Ordiziako udaletxean.
Ezenarrok azaldu duenez, 2010az geroztik elkarrekin antolatzen den kanpaina da eta, azken urteotan bezala, kanpainaren helburua da euskaraz egiten diren errenta aitorpen kopurua handitzea eta horretarako herritarrei jarraibideak eskaintzea.
Izan ere, 2024aren hasieran Gipuzkoan 92.173 herritarrek euskara aukeratuta daukate Aldundiko Ogasun eta Finantza Departamentuarekin harremanetan (2020an 80.519 herritarrek) eta, 2024ko errenta kanpainari begira, departamentuaren helburua da 100.000 pertsona fisikok aukera hori egitera iristea. Beraz, euskara edozein unetan aukera daiteke Ogasunarekin harremanak izateko eta errenta aitorpena aurkeztean ere bai.
Kanpainaren xehetasunak
Mariola Pascual Beasaingo Udaleko Herritarrak arloko buruak, kanpainaren xehetasunak aurkeztu ditu. Errenta aitorpena aurkezteko hiru bide daude eta guztietan erabil daiteke euskara:
Autolikidazio proposamena. Jasotako proposamena onartzerakoan, telefonoz nahiz internet bidez, euskaraz egin nahi duzula esan eta, aurrerantzean, Ogasunak agiriak euskaraz bidaliko dizkizu.
Mekanizatua:
- Hitzordua hartzerakoan, Ogasunarekin harremanak euskaraz izan nahi dituzula adierazi.
- Ogasunarekin bulegoko aurrez aurreko harremanak nahiz telefono edo Internet bidezkoak euskaraz izan ditzakezu, horrela eskatuz gero.
- Ogasunak sinatzeko ematen dizun orria ere euskaraz jaso dezakezu.
Internetez, Zergabidea atariaren bitartez:
- Errenta programaren euskarazko bertsioa jaitsi Internetetik eta hobetsitako hizkuntza atalean euskara aukeratu.
- Aholkularitza edo finantza erakunde batean egiten baduzu, euskaraz egiteko eska daiteke.
Euskararen aukera goruntz
Kepa Zubiarrain, Lazkaoko alkateak, errenta aitorpena eta Ogasunarekin harremana euskaraz izateko herritarren kopuruak izan duen gorakada nabarmendu ditu. Aipagarria da azken 13 urteotan, 2009tik 2022ra, Ordizian, Beasainen eta Lazkaon euskaraz egin diren errenta aitorpenen ehunekoa handituz doala:
Ordizian %8,29tik %23,82ra igo da euskaraz aurkeztu diren aitorpenen ehunekoa, Beasainen %8,37tik %22,18ra eta Lazkaon %15,52tik %32,19ra.
Eta hori horrela izaten jarraitu dezan, hiru udal ordezkariek errenta aitorpena euskaraz egitera gonbidatu nahi izan dituzte goierritarrak. orain arte, inertziaz edo ohitura faltagatik gazteleraz egin bada ere, era oso errazean euskaraz egin daiteke. Pauso erraz bat emanez sekulako bultzada eman daitekelako euskarari.
Datak
Errenta aitorpena egiteko datei dagokienez, hauexek dira aurtengoak:
- Aitorpenak aurkezteko epea apirilaren 16tik uztailaren 1era luzatuko da.
- Errenta aitorpena internetez egin nahi dutenek apirilaren 11tik uztailaren 1era arteko epea izango dute horretarako.
- Autolikidazio proposamenak onartzeko epea apirilaren 8tik uztailaren 1era izango da.
- Errenta mekanizaturako hitzordua eskatzeko epea apirilaren 12an hasi eta ekainaren 7an amaituko da.
