Maiatzak17, LGTBIfobiaren aurkako egunean, Beasaingo Udalak jendarte inklusiboa, zaintzailea eta proaktiboa aldarrikatu nahi du kolektibo honek pairatzen duen diskriminazioaren aurrean

30 urte dira, 1990eko maiatzaren 17an, Osasunaren Mundu Erakundearen (OME) Batzar Nagusiak homosexualitatea gaixotasun mentalen zerrendatik kendu zuela. Ordutik, maiatzaren 17ak oso balio esanguratsua du lesbiana, gay, trans, bisexual eta intersexualentzat, kolektibo horrek gaur egun aurre egin behar dion diskriminazioaren aurkako eta eskubideen aldeko jardueren ardatz katalizatzailea da eta.

Ehunka lagun hil dira gay, lesbiana edo transexuala izateagatik

Aurten, COVID-19aren ondorioz etxean erdi konfinaturik geratu behar dugunez, ezin izango da kalera irten manifestatzera, baina, berdin jarraituko dugu salatzen sexu eta genero aniztasunarekiko gorrotoak sortarazten dituen erasoak. Eraso horiek gure inguruan eta 70 estatutan baino gehiagotan gertatzen dira; izan ere, ILGA txostenaren arabera, sexu orientazioa kriminalizatzen da, eta horrek esan nahi du ehunka biktima hil direla, gay, lesbiana eta transexualak izateagatik.

Ezin dugu ahaztu, halaber, herrialde askotan LGTBI komunitateak diskriminazioari aurre egin behar diola mediku arreta jasotzeko orduan, Human Rights Watchek dokumentatu duen bezala. Diskriminazio horrek hainbat gaixotasun kronikoren arretan eragin dezake, eta, ondorioz, LGTBI pertsonak gaixotasun larriak izateko edo COVID-19ren ondorioz hiltzeko arriskuan egon daitezke bereziki.

Ez zaitzala LGTBIfobiak kutsatu

Beasaingo udaletik, maiatzaren 17an, jendarte inklusiboa, zaintzaile eta proaktiboa aldarrikatu nahi dugu, LGTBI kolektiboak oraindik aurre egin behar dien diskriminazio planoen aurkako borrokan eta eskubideak lortzearen alde ahaleginak batuko dituena. 

Uste dugu gizarte eragile guztien zeregina dela gizarte errespetuzkoagoa, bidezkoagoa eta integratzaileagoa eraikitzea, gure lan agendetan LGTBI kolektiboarekiko konpromiso esplizituak hartuz, oraindik indarrean dauden diskriminazio planoen aurkako borrokan aurrera egin dezagun. 

Ulertzen dugu une honetan COVID-19ren gaia dela eta haren ondorioak lantzea lehentasuna direla, baina Beasaingo udaletik inoiz baino gehiago jarraituko dugu LGBTI pertsonen eta haien ingurunearen ondoan, LGTBIfobiaren aurka borrokatuz, persona guztientzat berdintasuna eta askatasuna lortu arte.

Sektorearen ordezkariekin aldian-aldiko egindako bileren ondoren egoera larriari aurre egin eta normaltasunera iristeko bide luzean adostu diren lehen neurriak izango dira 

Beasaingo Udalak merkatari eta ostalariekin egindako bileren ondotik eta oposizioan dauden gainontzeko alderdien proposamenak jaso eta aztertu ondoren, alarma egoerak eragindako krisiari aurre egiteko hainbat neurri abiaraztea erabaki du. Udalak landu eta garatutako ekimenak merkatari eta ostalariek egindakoekin bat eginez, datozen egunetan jarriko dira martxan. Dena den, hasierako neurri hauei aurrera begira sor litezken beste ideia eta ekimenak batuko zaizkie, izan ere Udalaren iritziz tokiko merkataritza, ostalaritza eta zerbitzuen sekoreari lagunduz eta babesa emanez jarraitu beharko da aurrerantzean ere. 

Udal zerga eta tasetatik salbuestea

Laguntzak banatu eta emateko moduari dagokionez, alarma egoerak eraginda, itxita egon direnentzat edo fakturazioan %80ko jaitsiera eduki dutenei zuzenduko dira laguntzak.

Gauzak horrela, orain artean eta osasun alarma egoera ezarri zenetik istera behartuak izan diren merkatari, ostalari eta zerbitzuetako establezimenduak sei hilabeteko udal zerga eta tasetatik salbuestea izan da proposamena (kasu bakoitzaren arabera, ura, zaborra eta tabernen kasuan terrazetako tasak). 

Terrazen kasuan, sei hilabetez ez litzateke kobratuko eta azalera gehiago erabili ahal izango dute (pertsonen arteko distantziak mantentzeko), beti ere baimendutako mahai kopurua eta oinezkoen pasabideak errespetatuz. Uraren tasari dagokionez, Ur kontsortzioarekin lantzen ari da Udala hori ere sei hilabetez ez kobratzeko. Berdin zaborraren tasarekin, lanketa Sasieta Mankomunitatearekin egiten ari da. IBIaren kasuan, ordainketan hobariren bat ezartzea aztergai geratzen da. Foru Aldundiaren eskumena denez honek ez badu salbuesten, laguntza bat emango luke udalak ordainketa horretan. 

Erosketak seguru eta konfidantzaz egitea ahalbidetu

Establezimenduak irekitzeko baldintzak behartuta eta egoera berrira egokitzeko beharrezkoak diren osasun, higiene eta babes neurrien kostuaren %50a ordaintzeko prest egongo da Udala (establezimendu bakoitzari gehienez 500 euroko dirulaguntza emanez). Materialen erosketa Beasainen egitea baldintzatuko litzateke.

Erosketa bonoak merkaturatzea 

Erosketa bonoen sorrerak, Beasaingo saltokietan kontsumitzea izango du helburu. Udalak bi alditan aterako lituzke, udaberri-uda sasoian eta udazkenean errepikatuz emaitza ona bada. Guztira 15.000 bono ateratzea da asmoa, 7.500 bono txanda bakoitzean. Banaketa merkatari, tabernari eta zerbitzu establezimenduetan egingo litzateke. Helburua Beasainen erosketak sustatzea da. Erosleak finean 30 eurorekin 50 euroko gastua egin ahal izango du (udalak 20 eurorekin lagunduko luke bono bakoitza). 

Erosketak Beasainen egiteko sustapen kanpainak

Guzti honi lotuta, Udalak orain artean bere ardatz eta oinarri estrategikoen artean izan dituen merkataritza eta tokiko ekonomia indartu eta sustatzeko kanpainak areagotuko ditu. Hortara indarrak bideratuz, Beasainen erosketak egiteko beharrezkoak diren sentsibilizazio kanpainak eta baliabideak erabiliko ditu helburu zehatz batekin: erosketak Beasainen seguru egiteko herritarrak kontzientziatzea.  

Orain arte, konfinamendu egoeran ezarritako arauak modu eredugarrian bete dituzte beasaindarrek. Konfinamenduaren leuntzearen lehen fasean sartzean egoera berri baten aurrean aurkitu gara eta hemen iritsi dira jokabide aldaketak. 

Saltokiak eta, batez ere, ostalaritza establezimenduak ireki diren lehen egunean orohar, oinarrizko segurtasun, babes eta osasun neurriak ez dira bete hainbat herritarren aldetik. Bereziki, pertsonen artean bi metroko segurtasun tartea mantentzeari dagokiona. Tabernariekin udalak egindako bileren ondotik arauak ezarritako egoerara egokitzeko, taberna bakoitzaren terrazetako espazioak eta mugak adosten ari da. 

Gertatutakoa ikusirik, Udalak herritarrei gogorarazi nahi die erantzukizunez, zentzuz eta arduraz jokatzen jarraitu behar dela osasun agintariek adierazitako arauak betetzerako orduan. Gogoan izan behar da alarma egoeran jarraitzen dugula. Kutsatzeko arriskuak bere horretan jarraitzen du, eta ez da ahaztu behar gaixotasunarekiko ahulenak direnei, hots, gure adinekoak bereziki direla kaltetuenak. Hori dela eta, jende pilaketak saihestea eta edozein egoeran pertsonen artean gutxienez bi metroko distantzia mantentzea eskatzen da. Atzera egin ez dezagun gorde distantzia.

Asteazkenean, maiatzak 13, berriro jarriko da martxan TAO zerbitzua udalerri osoan. Koronabirusaren pandemiak eragindako alarma egoera ezartzearen ondorioz zerbitzua etenda geratu zen eta orain merkataritza eta ostalaritza establezimenduak ireki ondoren, aparkalekuetako ordainketa zerbitzua berriro abiaraziko da. Lehen egunetan malgutasunez jokatuko dute zaintzako langileek, arau hausteak ez dituzte isunekin zigortuko baizik eta ohartarazpenak jarriko dituzte.