Beasaingo Udalak Txilibutxof aisialdi taldearekin eta ikastetxeetako guraso elkarteekin elkarlanean, covid 19ak eragindako babes eta segurtasun baldintzetara egokituta antolatu ditu euskarazko udalekuak

Euskararen jakintza eta erabilera aisiarekin lotuta bultzatzea helburu duten udalekuak burutuko dira ekainaren 22tik uztailaren 31ra. Beasaingo Udalak, bizi dugun egoera berezi honek baldintzatuta osasun eta segurtasun neurriak kontuan izanda antolatu ditu udaleku irekiak Txilibutxof elkartea eta herriko ikastetxeetako guraso elkarteen laguntzarekin.

Azken asteetako egoera aztertu eta hiru aldeek egindako bileren ostean, Udalak lehentasun duen euskararen erabilera sustatzeko, udaleku ireki formatuan eskainiko du zerbitzua astelehenetik ostiralera, goizez 9.00etatik 13.00etara. Hartzaileak, Haur Hezkuntzako 3,4 eta 5 urteko haurrak eta Lehen Hezkuntzako ikasleak (1etik 6. mailara) izango dira. 

Udalekua 3 txanda ezberdinetan banatuko da. Txanda bakoitza bi astekoa izango da data hauetan banatua:  

  • 1. txanda: Ekainak 22- Uztailak 3  
  • 2. txanda: Uztailak 6- Uztailak 17
  • 3. txanda: Uztailak 20- Uztailak 31 

Kopuru mugatuak

Txanda bakoitzeko haur kopurua mugatua izango da. Izen ematea Ekainaren 8an, astelehena, irekiko da eta ekainaren 11n, osteguna, itxiko da. Beraz, gomendatzen da ahalik eta azkarren izena ematea. Haur bakoitzak nahi adina txanda aukeratu ditzazke. Izena ematean galdetegi bat bete beharko da. Galdetegi hau Txilibutxofen web orrian egongo da ekainaren 8tik aurrera. Galdetegia bete ondoren, erantzun-mezu bat bidaliko da datuak jaso direla jakinaraziz eta ordainketa egiteko jarraibideekin. Izen ematea behin betikoa izango da ordainketa egin ostean. Ordainketa egiteko azken eguna Ekainaren 12a izango da (12a barne). 

Haur Hezkuntzako umeen kuota txanda bakoitzeko 80 eurokoa izango da. Lehen Hezkuntzakoena aldiz, 100 euro. Familia ugaria izanez gero, Haur Hezkuntzako haur bakoitzak 70 euro ordainduko ditu txanda bakoitzeko eta Lehen Hezkuntzakoek 90 euro. 

Galdetegiarekin batera, hainbat dokumentu atxikituko dira sinatu beharrekoak eta hauek udalekuaren lehenengo egunean aurkeztu behar dira. Dokumentuak sinatuta aurkeztu ezean, haurra ez da onartuko. Batetik, haurrari argazkiak ateratzeko baimena sinatu behar da. Bestetik, haurra udalekura osasuntsu eramatearen ardura gurasoek bere gain hartuko dutela aitortuko dute. 

Osasun sailak agindutako babes neurriak bermatuko dira

Ez ohiko egoera honetan Osasun Sailak emandako gomendioak jarraituko dira:

  • 10 haurrez osatutako taldeak banatuko dira eta taldeak ez dira elkarren artean nahastuko. Talde bakoitzari espazio itxi bat egokituko zaio eta beti gune hori erabiliko dute. Erabiliko diren espazioak Txilibutxofen egoitza Urbieta etxean, Loinazko San Martin plaza azpian dagoen hizkuntza errefortzurako aretoa eta ikastetxeetako guneak izango dira.
  • Eskuak garbituko dira. 
  • Musukoak erabiliko dira segurtasun distantziak bermatu ezin direnean. 
  • Ahal den heinean, eguraldia lagun aire zabaleko ekintzak egingo dira.

Informazio edo argibideetarako idatzi helbide honetara Helbide elektroniko hau spam roboten kontra babestuta dago. JavaScript aktibatuta eduki behar duzu hau ikusteko. 

EHBilduk aurkeztutako mozioarekin, herritarrak engainatzen saiatzea leporatu zion Udal Gobernuak koalizioari. Aldundiak udalei egin dien diru banaketaren murrizketa alde bakarreko erabakia dela aipatzea okerra zela nabarmendu zuen eta mozioaren aurka bozkatu zuen

Gai-zerrendako beste gai batzuen artean, Covid 19ak eragindako ondorioei aurre egiteko kreditu gehigarriak onartu ziren eta Maddi Imaz zinegotziak bere kargua utzi zuen

Modu telematikoan egin zen maiatzeko osoko bilkuran, EHBildu udal taldeak mozioa aurkeztu zuen Beasaingo Udalak Foru Aldundiari, Udal Finantzaketarako Foru Funtsaren itzulketa negozia zezala eskatuz. Aurkeztutako idatzian, Aldundiak udalei egiten dien diru banaketan %20ko murrizketa aplikatzea aldebakarreko erabakia zela aipatzen zen. 

Gobernu taldeak aipamen hauek okerrak direla nabarmendu zuen. Alkateak bere azalpenean argitu zuen itzulketa ez dela Aldundiaren erabaki baten ondorio. “Azken hiru urteetan adibidez, emaitza positiboa egon denean, orain erabili den formula berbera eta elkarlan berbera erabili dira. Aldiz, aurreikusitakoa baino gutxiago jasotzen bada (Foru Aldundiak iada kalkulatu du sarrerak %20an jeitsiko direla), itzultzea tokatuko zaigu”. 

Udal Finantzaketarako Foru Funtsa hiru erakundeen arteko (Eusko Jaurlaritza, Aldundia, Udalak) akordio batean oinarrituta dago, eta akordio horren bidez erabakitzen da zerga bilketaren bitartez Foru Aldundiak jasotakoa Udalei nola banatu.

Urte bati dagokiona, urte horren haseran aurreikusten da eta hurrengo urteko otsailean likidatzen da. Udal Gobernuak adibidez, aurrekontuetan ez zuen Aldundiak aurreikusitakoa jarri diru-sarrera moduan, gutxiago baizik. Era horretan eta zuhurtziaz jokatu zenez, aurrekontuetan, aurreikusitakotik %10a jeitsi beharra suposatuko du. 

Ondorioz, alkateak gaineratu zuenez, “ez da mozioan aipatzen den bezala aldebakarreko erabakia, hiru erakundeen artean hitzartutakoa baizik. Hori horrela, krisi egoera honek zuzenean eragingo die finantza egoera zailean dauden udalei, edo aurreikuspenetan zuhurtziaz jokatu ez dutenei, foru araua betetzeko zailtasunak izango bait dituzte”. 

Udalaren egoera ekonomikoa ona

Hori ez da Beasaingo Udalaren kasua izan. Zuhurtziaz jokatu izanaren ondorioz, %10 itzuli beharko da eta kontuak osasuntsu edukitzeak, horretarako ahalmena ematen dio Udalari. Hori horrela, gobernu-taldeak mozioaren aurka bozkatu zuen. Talde sozialista, bere aldetik, abstenitu egin zen. Taldeko bozeramailearen esanetan, azken asteetan mahai bat osatu da hainbat udalek eta gainerako erakundeetako ordezkariez osatua. Bertan aztertuko dira Foru Aldundiaren eta udalen arteko krisiaren aurkako politikak eta finantza-egoera zailean dauden udalen itzulketen kudeaketa. Mozioa ez zen onartua izan aurkako 9 botuekin (EAJ-PNV), 2 abstentzio (PSE) eta aldeko 4 (EHBildu).

Covid 19ak eragindako kalteei aurre egiteko  diru-laguntza gehigarriak 

COVID-19ak eragindako ondorioei aurre egiteko diru-laguntzak onartu ziren aurkako EHBilduren botoekin eta EAJ-PNV eta PSE-EEren aldeko botoekin. Diru-laguntzak, merkatarientzako bonoak eta babes neurriak hartzeko eta gizarte larrialdietarako planteatu ziren. Horrez gain, aurrera begira herritarrentzako banatu diren maskarentzako ere dirua jarri beharko zela aipatu zuen Aldasoro alkateak. 

EHBilduk aurka bozkatzearen arrazoia, beraiek beste planteamendu bat egin izana arrazoitu zuten. Alkateak, Udaleko hiru alderdiak batzen dituen horretan begiak jartzea egokiagoa dela adierazi zuen eta bozkatutakoa, denek amankomunean dutena dela.   

Maddi Imazek zinegotzi kargua utzi du

EHBildu udal taldeko Maddi Imaz zinegotziak bere karguari uko egiten zuen idatzia aurkeztu zuen. Horren arabera, bere erabakia, “justifikaziorik ez duen egindako arduragabekeria baten” ondorioz izan dela adierazi du. Arrazoi horrengatik barkamena eskatzen du idatzian bere udal talde zein Beasaingo herriari eta era berean eskerrak ematen dizkie bere taldekideei jasotako laguntzagatik. 

Babes eta segurtasun neurriak betez burutuko da eta azokako produktuez osatutako 2 saskiren zozketa egingo da erosleen artean

Koronabirusak hala behartuta denboraldi batean hileko lehen larunbateko azoka bertan behera geldituta egon ondoren, larunbat honetan, ekainak 6, berriz ere martxan izango dugu garaian garaiko bertako produktuen azoka berezia. 

Itzulera honetan, ilarrak eta kalabazinak izango dira produktu izarrak eta hurrengo azokan ia udako produktuak eskuratzeko aukera izango da, besteak beste, tomatea. Honetaz gain, Loinazko San Martin plazara gerturatzen direnek produktu hauek erosteko aukera ere izango dute: eztia, barazkiak, loreak, txerrikia, haziak, ogia, gozoak, gazta, eta artisautza produktuak. 

Larunbat honetan bertako produktuen azoka segurtasun eta babes neurriak hartuta burutuko da, hala nola maskara, pertsonen arteko distantzia eta higiene arauak bete beharko dira. Ekintza tailer didaktikoa eta trikitilarien musikarik egongo ez bada ere 10:00etatik 14:00etara egongo da azoka zabalik. 13:30ean azokako produktuez osatutako 2 saskiren zozketa egingo da azokan erosketak egindakoen artean.

Hileko lehen larunbateko azoka berezia duela ia hiru urte Udal gobernuak martxan jarritako egitasmoa da eta honen helburua, bertako ekoizleen eta baserritarren lana balioan jartzea eta garaian garaiko produktuen kontsumoa areagotzea ez ezik, kontsumitzaileak azokara erakartzea ere bada. Horretarako, azoka dinamizatzeko ekintza ezberdinez osatutako egitaraua antolatzen da hilero.

Bi Udal zerbitzuek ekainaren 3an irekiko dituzte ateak modu seguruan eta agintariek ezarritako osasun eta babes neurriez gain udaleko prebentzio enpresak egindako ikuskapenaren bermearekin 

Beasaingo Udalaren eraikin eta zerbitzu publikoak babes eta neurri berezien baldintzapean berriz irekiko dituzte atea. Koronabirusaren ondorioz ezarri zen alarma egoerak eraikin publiko guztien itxiera ekarri zuen eta orain honen leuntzeak ekarritako egoera berriak zenbait baldintzekin ateak irekitzeko aukera eman du. 

Honela bada, Beasaingo Liburutegia datorren asteazkenean, ekainaren 3an irekiko da. Erabilera neurriak finkatzeko, Eusko Jaurlaritzak eta Osalanek liburutegientzako prestatutako protokoloa jarraitu da eta Udaleko prebentzio enpresaren ikuskapenak emandako oniritziarekin zerbitzua ematen hasiko da. Aipatu behar oraingoz, mailegu eta itzulketak egiteko aukera eskainiko zaiela erabiltzaileei; bertan irakurtzen, ikasten, eta ordenagailuetan ibiltzen egoteko aukerarik ez da izango, momentuz. Honakoak izango dira jarraitu beharreko neurriak:

Igartzako Monumentu Multzoan bisita gidatuak egiteko aukera berriz ere 

Bisitarien segurtasuna bermatuz, osasun, babes eta egokitzapen neurri guztiak hartuta, Igartzako Monumentu Multzoak ere, ekainaren 3an, asteazkenean, irekiko ditu ateak. 

Udako ordutegiarekin irekiko dira ateak:

Asteazkenetik igandera: 11:00etatik 14:00etara eta 16:00etatik 19:00etara. Egunean zehar 11:30ean, 13:00etan, 16:30ean eta 18:00etan bisita gidatuak eskainiko dira egunero talde txikietan. 

Bisitaldiaren ibilbidea ere alarma egoeraren leuntze faseak ezarritako baldintzetara egokitu da beste talde batzuekin ez topatzeko, izan ere helburu nagusi eta bakarra bisitak modu atseginean eta seguruan egitea da. 

Alarma egoerak dirauen bitartean eta leuntze faseak aurrera doazen einean bisita gidatu tematikoak, erakusketak eta tailerrak eskaintzeko asmoa dagu gure ondarea ezagutzera emateko asmoz.