Mugikortasun jasangarria eta irisgarriagoa bultzatzea eta noizbehinka autoz mugitzeko premia dutenei irtenbide malgua eskaintzea dira zerbitzuaren helburu nagusiak
Guupy aplikazioaren bidez autoa behar denean soilik alokatuz, jabetzan edukitzearen kostua saihestu eta ibilgailu elektrikoaren abantailaz baliatu daiteke
Beasaingo Udalak ibilgailu elektrikoak alokatzeko zerbitzu berri bat aurkeztu du, car sharing eredukoa. Egitasmo hau, Udalak jasangarritasun ekonomikoa, soziala eta ingurumenekoa garatzeko dituen lan ardatzen barruan kokatzen da eta ingurumena gehiago errespetatzeko konpromisoari lotzen zaio.
Gernika pasealekuko aparkalekuan eskuragarri egongo den zerbitzua jendaurrean aurkeztu dute Adur Ugartemendia Lurraldea arloko buruak, zerbitzua eskainiko duen GUPPY enpresako Sara Fernández eta Carlos Garcia arduradunekin batera.
Erabiltzaileei ibilgailu elektrikoak alokatzeko aukera eskainiko die, bereziki bi Tesla Model 3, herrien arteko ibilbide motz eta ertainak egiteko aproposa. Aukera hori irtenbide ezin hobea da ibilgailu bat erosteko premiarik gabe beste bat behar dutenentzat.
Zerbitzuaren helburuak eta funtsezko onurak
Udal arduradunek aurkezpenean adierazi dutenez, ibilgailua alokatzeak eta partekatzeak (car sharing), ibilgailu elektriko bat erosteko hasierako inbertsio handia egin beharra saihesten du, baita mantentze lanen, aseguruen eta zergen kostu gehigarriak ere. Gainera, kargarako elektrizitatea erabiltzea erregai tradizionala baino merkeagoa da, eta horrek nabarmen aurrezten du kilometroko kostua.
Ingurumenari onurak: ibilgailu elektrikoen bateriak (BEV) ez dute CO2rik edo bestelako kutsatzailerik isurtzen, eta horrek airearen kalitatea hobetzen eta karbono aztarna murrizten laguntzen du. Gainera, partekatutako autoen eskuragarritasunak zirkulazioan dauden ibilgailuen kopuru orokorra murrizten laguntzen du, trafikoa arinduz eta mugikortasun eredu jasangarriago bat sustatuz.
Malgutasuna eta erabilgarritasuna: Zerbitzua erabiltzaileen unean-uneko beharretara egokitzen da, 150 eta 400 km arteko autonomia duten ibilgailuen modeloekin, bidaia laburrak edo ertainak egiteko nahikoa. Gainera, Guppy-ren aparkaleku sareari esker, Bilbo, Donostia, Xixon, Oviedo, Aviles, Santander, Torrelavega eta Madril hirietan utzi daiteke ibilgailua eta berdin Bilbo, Santander eta Madrilgo aeroportuetan.
Hiri-politiken abantailak: Partekatutako ibilgailu elektrikoek sarbide librea dute isurpen gutxiko eremuetara (IGE), murrizketarik gabe. Gainera, estrategikoki kokatutako kargatzeko puntuak daude, ibilgailu elektrikoak erabiltzeko behar den azpiegitura optimizatzeko.
Sinpletasuna eta segurtasuna: Zerbitzuak aseguru integrala eta 24/7 laguntza teknikoa barne hartzen ditu, erabiltzaileei lasaitasuna ematen diena. Halaber, motor elektrikodun ibilgailuak frogatzeko aukera ematen du etorkizunean konbustiodun motorra duten gidariak teknologia elektrikoetara jauzi egin dezaten.
Beasaingo zerbitzuaren ezaugarriak
Zerbitzua Gernikako pasealekuko aparkalekuan dago, herriaren erdigunean. Alokairurako bi ibilgailu elektriko daude (Tesla), eta hiru aparkaleku izendatu dira eskainitako zerbitzurako. Toki horretan ibilgailu elektrikoentzako sarbide errazeko bi karga-puntu daude, %100ean iturri berriztagarrietatik lortutako argi-indarra hornitzen dutenak.
Zerbitzua erabiltzeko, erabiltzaileek Guppy aplikazioa deskargatu beharko dute gailu mugikorrean, ibilgailuen alokairua kudeatzeko. Informazio guztia eta tarifak www.guppy.es webgunean daude eskuragarri.
Car sharing zerbitzu hau mugikortasun ekologikoago eta irisgarriago baterako urratsa izateaz gain, Beasaingo trantsizio energetikoaren eta jasangarritasunaren aldeko apustu argia ere bada. Hiri kanpoko joan-etorrietarako aukera malgu eta ekonomikoa eskaintzen duenez, Beasaingo Udalak etorkizun garbiagoa eta ingurumenarekiko errespetuzkoagoa izateko konpromisoa indartzen du.
