Udal ordezkariak, antolakuntzaileak eta Loinatz Txirrindulari Elkartekoak apirilaren 9 eta 10ean txirrindularitza probak eragingo duenaz mintzatu dira ekitaldiaren aurkezpenean
Bi egun horietan, bai amaiera eta irteerako ordutegietan trafikoa etenda egongo da herri gunean
Beasain txirrindularitzaren erdigunea bihurtzeko prestatzen ari da apirilaren 9an eta 10ean, Itzulia Basque Country lasterketa ospetsuaren hirugarren eta laugarren etapak hartuz. UCI WorldTour egutegiko proba garrantzitsuenetako bat da Itzulia eta munduko txirrindulari onenak biltzen dituen lasterketa Beasainera itzuliko da hamabi urteren ondoren.
Parte-hartzaileen indarrak eta estrategia probatuko dituen ibilbidearekin Beasainek 3. etaparen amaiera eta 4. aren hasiera hartuko ditu. Hitzordu honek, herriak kirolarekin eta txirrindularitzaren sustapenarekin duen konpromisoa indartzeaz gain, Beasain nazioarteko txirrindularitzaren begirada guztien erdigunean jartzen du. Hala adierazi du Beasaingo udaletxean egindako aurkezpenean Leire Artola alkateak.
Berarekin batera, Elena Ruiz kirol zinegotzia, Javier Riaño Oceta antolakuntzako presidentea, Aitor Escalante udaltzainburua eta Loinaz Txirrindulari Elkarteko Patxi Iturrioz eta Victor Martinez izan dira ekitaldi honen xehetasunak ematen. Alkatearen hitzetan: "Beasainentzat, bi etapa hauek hartzea benetako ohorea da. Txirrindularitza gure nortasunaren parte da, eta gure herriak historikoki erakutsi du kirol honekiko duen grina. Gainera, aukera paregabea izango da gure bizilagunek eta bisitariek maila goreneko lehiaketaz gozatzeko. Itzuliak Beasain nazioarteko txirrindularitzaren mapan jartzeaz gain, eragin positiboa du bertako ekonomia eta turismoan".
Javier Riañok, proba antolatzen duen OCETAko presidenteak, Beasainek lehiaketan duen balio estrategikoa azpimarratu zuen: "Beasain giltzarri da Itzuliaren historian, eta asko pozten gaitu hona itzultzeak. Zaleen erantzunak eta herriak txirrindularitzarekin duen konpromisoak eszenatoki ezin hobea egiten dute ". Lehia irekia egongo dela ere gaineratu du eta Jon Izagirre txirrindulari ormaiztegiarra faboritotzat eman du Beasaingo etapa irabazteko.
Bestalde, Victor Martinezek eta Patxi Iturriozek, Loinaz Txirrindulari Elkartearen izenean, parte hartu duten guztien ahalegina nabarmendu nahi izan zuten: "Honelako ekitaldiak ez lirateke posible izango hainbeste pertsona eta erakunderen laguntzarik gabe. Gure elkartetik, hamarkadak daramatzagu Beasainen txirrindularitza sustatzen, eta harro gaude kirolaren festa handi honen parte izateaz ".
Trafikoan eta aparkalekuetan eragina
Aitor Escalante udaltzainburuak trafiko eta segurtasun neurrien berri eman du: "Lan handia egin dugu lasterketa gorabeherarik gabe igaroko dela bermatzeko. Herritarrei laguntza eskatzen diegu eragozpenak minimizatzeko eta dena modu seguruan garatzen dela ziurtatzeko ".
Apirilaren 9an, hirugarren etaparen amaiera Beasainen izango da, Nafarroa Etorbidean hain zuzen ere, eta horrek 15:15 eta 18:00 artean herri gunean trafiko etetea ekarriko du. Hurrengo egunean, apirilaren 10ean, laugarren etapa Beasaindik abiatuko da, 12:15 eta 13:30 artean zirkulazioa moztuz. Gainera, aparkaleku batzuk lasterketaren logistikarako erreserbatuta egongo dira apirilaren 8tik, Bernedoenea, Gernika Pasealekua (pergolak) eta Erauskin Plaza barne. Egun horietan, ibilgailua ahalik eta gutxien erabiltzeko gomendioa luzatu du udaltzainburuak.
Udalak herritarren lankidetza eta ulermena eskatzen du, ekitaldiak eragindako eragozpenak gutxitzeko, garaje pribatuak erabiltzea eta joan-etorriak aldez aurretik planifikatzea gomendatuz.
Ekitaldia ez litzateke posible izango hainbat erakunde eta boluntarioren ahaleginik gabe. Bereziki eskertzen da Itzulia antolatzearen, bertako enpresen eta Loinatz Txirrindulari Elkartearen laguntza, eskualdean txirrindularitza bultzatzen jarraitzen baitute.
