UNAI EGUREN RETOLAZA
COVIDARI BERTSOAK
Txinan hasi ta mundu osora
lortu zuen hedatzea
ez da erraza ez esplikatzen
hark sortu zuen trantzea
une batean lortu zuena
gizakiak itotzea
Iraun zituen bi urte haiek
hobe mapatik kentzea
Birus zitala azkar hasi zen
kutsatzen jende gehiago
hastapenean gu ondo geunden
lasai hori Txinan dago!
Europan azkar sartu ostean
egin zitzaigun arraro
eta gurera heldu zenean
orduan ia akabo
Ta uholdea azkar sartu zen
baita denok busti ere
ospitaleak egin zituen
osotasunean bere
kaltetuenak izan zirenez
hainbat ta hainbat agure
hilerrietan jarri genitun
malkoz makina bat lore
Hamabost egun egin zituzten
eskola guztiak itxi
hastapenean ezin genuen
egia zenik sinetsi
baina aspertzen hasi ginenez
azkenean ezin eutsi
kartzelan gisa egon ginen ta
ez degu meritu gutxi
Nola utzi ba aipatu gabe
orduko hainbat momentu
azkenenerako bihurtu ziren
hamaika etxe konbentu
ta komuneko papelik gabe
gelditu_ezean kontentu
txakurrak ondo paseatzeko
bazen nahikoa talentu
Eta honetan txarren-txarrenak
osakidetzaren zamak
eta jendeak ezin ulertu
aditu haien esanak
momentuero moldatu behar
ospitaletako lanak
ez dakit inoiz eskertu diren
ordun egindako danak
Doinua: Oh baserritxo
