IRANTZU ESKISABEL ARANBURU
ERORI
Orri zuri baten aurrean nago, mutu.
Ondo egin behar dut…
Eskola, babesleku ala infernu?
Eskola, ikusten duten itsuz betetako paradisu
Eskola, sasiz betetako zelai loretsu.
Etxean nago, bunker bilakatu den egongelan itxita.
Telebistari bolumena igo diot eta belarriak estali dizkiot
lasai, laster amaituko da…
Garrasiak, maitasun hitzak, isiltasuna
maitearen negarra, sasi artean dagoen krabelina.
Zauriak dakartza arrastaka
desberdina izatearen arrakasta,
krabelinari arantzak kendu nahi dizkion ume heldua naiz.
Ondo egin behar dut…
haur heldua naiz, umea ala heldua?
Pirritx eta Porrotx ikusten duen umea
krabelina ekaitzetik babesten duen loretxoa
haserretzen ez den umea
maitea salbatu nahi duen lorea.
Ondo egin behar dut…
Askotan ikusezin sentitzen naiz
Infernua atzean utzi dugu,
udaberri luze bat hasi.
Lagunak!
Krabelinak ez du zauririk,
orbainez estalita gaude,
ez dut nahi ikusterik.
Iraganak ez nau definitzen!
Pum! Korrika noa, atzera begiratu gabe
iragana mendi artean galtzen da
ikusi egin naute!
Pum! korrika noa, atzera begiratu gabe
iragana orban txiki bat da
Pum! Pum! Pum!
Lasterka jarraitzen dut,
erortzen banaiz?
Ondo egin behar dut…
Ikusezin bilakatu naiz,
baso bateko zuhaitz goibel nahiz bakarti
Lagunak? apurtzen naute maiz
orbainek erre gogorki
Zergatik? Desberdina naizelako?
Ez naute jotzen, ez kontuan hartzen
Ez naute iraintzen, ez hitz egiten
Ez naute jarraitzen, ez itxaroten
Ez naute ikusten.
Ama lasai, ez dit min ematen.
Ondo egin behar dut…
Aldaketak, zein gogorrak, ezta?
Zurrunbilo batek harrapatu nau.
Etorkizuna jarraika, denbora haizeak darama
erabakiak hartu behar ditut,
hauek dira aurrera jarraitzeko arma
Ondo egin behar dut…
Orbainek iragana dakarte,
etorkizuna parez pare
ihes egi nahi dut, beste norbait izan.
Erortzen banaiz?
Ondo egin behar dut…
Itxaron, ondo zergatik?
Eroriz gero, altxa naiteke, ezta?
Neure burua da nire muga bakarra
Orri zuri baten aurrean nago, mutu.
Erortzeko prest.
