AMETS ZURUTUZA ESKISABEL
EUSKARA
Gizakien lehen ahoek
erditu zintuzten,
baso berdeen hats umelak
eman zizun ongietorria.
Oinutsik ibili izan zara
haitz mendietan.
Kalatxoriak lagun izan dituzu
portuko kresalaren baladetan.
Urteetan zehar ibiliz
denboraren bidean,
pauso arinez.
Mendeetan zehar
arnastutako denborak,
kimutik adar
eta adarretik zuhaitz
bilakatu zaitu.
Sustraietatik abiatutako
hizkuntza zakarra,
adar puntako lorea bezala
loratu den izana.
Ez da beti erraza izan
bidean aurrera jarraitzea.
Ahotsa ito dizute
behin, eta berriz,
etengabean.
Izuaren eta etsipenaren
atzean izkutatzera behartua,
itzalen artean bizirauten.
Lasai, badoa etsaia,
aske bidean zara
zabaltzeko.
Joan dena
joana,
eta hemen dena
hemen da.
Baina hemen dena
sortzeko geratzen da.
Mila gauza zara,
dena batean finkatuta:
hizkuntza, kultura
izana…
Baina zer zara,
ez bazara Euskara?
