Xabier Etxeberria Garro (Zarautz, 1974)
Enpresa Zientzietan lizentziaduna da eta alor horretan egiten du lan Lasarten, munduan barrena ere ibili ugari egin behar izaten dituen arren: Korean, Indian…
Kulturaren munduan saltsa asko probatutakoa da, herri mailako taldeetan batez ere: bertsotan, antzerkian, Euskadi Irratian ere bai… Literaturari dagokionez, hainbat sari irabazi ditu bakarka (Imajina ezazu Euskadi, Basauriko Ipuin erotikoena…), eta haur literaturako Lizardi saria bere anaia Martinekin batean, Airean ere negu usaina nabari da kontakizunaren bitartez.
Egun denak ez dira berdin
27 urte ditu Tasio Ardanazek: ez lanik, ez neskarik, inoiz ezer taxuzkorik egin ez eta aspertua dago bizitzaz, ezertarako ilusiorik gabe. Egun batean, ordea, auto-istripu baten ondotik eraztun bat deskubrituko du hildakoaren eskuan, zer edo zer ezkutua sumatuko du hor, eta misterioa argitu nahian hasiko da.
Detektibe-istorio hankazgoratu bat aurkituko du irakurleak nobela honetan, Miren izeneko tabernari baten maitasun eta bakardadezko kontakizun hunkigarria ere bai, gaurko gazteriaren erretratu zorrotz bat, epikatik eta topikoetatik ihes egiten duena, eta askoz gauza gehiago.
Indartsu dator Etxeberria letren plazara, erregistro eta estilo ugari menderatuz: intriga, pertsonaien psikologia, amodio-kontuak, umore batzuetan beltz besteetan ironikoa… Hori dena, erritmo bizi eta idazkera arin batekin: esaldi laburrak, kaleko hiztegia, espresibitate handia… Hitz batean esanda, ezagutu beharreko idazlea.