Egungo egoerak baldintzatuta Mugikortasun Mahaia dinamizatzeko arduradunek galdetegia prestatu dute iritzi bilketarekin jarraitzeko

Beasaingo Udala, gizarte-eragile, entitate pribatu eta bizilagunekin batera Beasaingo Mugikortasun Jasangarrirako Mahaia bultzatzen ari da. Otsaileko aurkezpenaren ondoren bigarren topaketa bat aurreikusita zegoen elkarrekin herriko mugikortasun arazoei buruz hausnartzeko.

Koronabirusarengatik ezarritako konfinamendua dela eta, aipatutako saio presentziala atzeratu egin da eta honen ordez galdetegi digital bat prestatu da. Helburua Beasaingo mugikortasun ohiturak hobeto ezagutzea eta bizilagunen iritzia jasotzea da. Horregatik herritarren, tokiko eragileen eta mugikortasunaren inguruan zeresana duen edonoren iritzia eta laguntza ongi etorria izango da Beasaingo Udalaren webean mugikortasun mahaiaren atalean jarritako galdetegia betez, 5 minutuko lana besterik ez da. Galderak egoera normalarekin daude lotuta, egungo alarma-egoeratik kanpo. Galdetegira helbide honetan klikatuz iritsi daiteke.

Galdetegia 2020ko apirilaren 30ra arte irekita egongo da eta parte hartuko dutenen kolaborazioa eskertua geratzen da. Galdetegia ez da izando tresna bakarra iritzi eta proposamen bilketarekin jarraitzeko. On line bideo-dei bidezko taldeko bilerak zein bakarkako elkarrizketak burutzea aurreikusten da. Era berean irekita jarraitzen dute parte hartzeko orain arteko bideak, hala nola Helbide elektroniko hau spam roboten kontra babestuta dago. JavaScript aktibatuta eduki behar duzu hau ikusteko. helbide elektronikoa eta udalaren sare sozialak. 

Positiboen kopurua erdira jaitsi da eta instalazioen desinfekzio-lan zorrotzak mantentzen dira

Osasun-alarma ezarri zenetik eta Arangoiti egoitzak bisitei ateak itxi zituenetik, daturik onenak erregistratu berri dira azken honetan.

Azken testetan bildutako emaitza onek adierazten dute une batez hobera egin duela kutsatutakoen kopuruak. Horrela, egoiliar guztiei egin zaie kutsatuta dauden edo ez jakiteko frogak. Batzuei bi test mota gin zaie; odolekoa eta PCR deiturikoa. Koronabirusaz positibo eman zuten azken egoiliarrei bigarren proba egin ondoren, guztiek emaitza negatiboa eman dute. Beraz, egoiliarren artean hiru positibo baino ez dira geratzen. Beste bi ospitalean daude.

Plantillari dagokionez, langile guztiek, batek izan ezik, negatibo eman dute azken probetan. Kasu positibo bakarrak negatibo eman du PCR testean, beraz, gaixotasuna pasatu duela suposatzen da. Egoitzan zazpi pertsona hil dira orain arte koronobirusaren ondorioz.

Etxez etxeko laguntza eskaintzen zaien pertsonen artean ere ez dago oraingoz eta dakigunik, positiborik. Adinekoak babesteko hartutako neurriak funtzionatzen ari dira antza denez. Horregatik, Arangoiti kudeatzen ari direnei eskerrak eman behar zaie eta berdin herritarrei beraien malgutasun, borondate eta seriotasunagatik ezarritako arauak betetzeagatik. 

Desinfekzioa lau egunetik behin

Bestalde, segurtasun eta higieneko prebentzio-neurriekin jarraituz, bihar, igandea, hilak 19, 23:00etan, suhiltzaileak zazpigarren aldiz itzuliko dira konfinamendu-aldi honetan zehar Arangoiti egoitzako instalazioak desinfektatzera. Desinfekzio-lana suhiltzaileek eurek antolatzen zuten, astean behin eginez, baina Udalak hala eskatuta, lehentasunez desinfekzio-lana lau egunez behin egitera pasa ziren.

Beasaingo azoka beasaindarron artean zeresana eragiteko erabili nahiak sinadura bilketa barne, enegarrengoz udal gobernua azalpenak ematera behartzen du.

Baserritarrek beraien produktuak ezin dituztela merkaturatu diote. Beasaingo kasuan, ez da hori zuzena. Debekua eman zen lehen egunetik, Udaletik ekoizleari, bere produktua erosi baitzaio edo erosteko aukera eman. Bestetik, beraien telefono zenbakiak, egunak eta saltzeko duten produktuarekin orriak egin eta banatu dira. Horren ondorioz adibidez, azken aste honetan Udalak ezin izan die ezer erosi. Eta pentsa Goierrin bakarrik, janarien beharra duten 400 familiatik, 600 familiara pasa gerala ditxosozko birusa tarteko. Gurutze Gorriak emandako datuak dira. Behar gorria dutenei banatzen saiatzen gera erositako produktua.

Horrela, ekoizleen ekonomia ere babesten dugu eta garrantzia du horrek. Beraien lana erabat “errazten” dugu, guztia erosteko prest baitago Udala.

Segurtasun neurriak hartuaz ezin daitekeen azoka egin galdetzen da. Azoka gunean neurriak betetzea nahiko erraza izan daiteke. Higiene ikuspegitik bederen, (distantzia, guanteak edo maskarak erabili araziz). Bestea da dekretuak dioen bezala, 65 urtetik gorakoen salerosketa debekatzearena. Inguruko adibideak ikustea besterik ez dago, dekretuak ezartzen dituen neurriak ez direla betetzen ari ikusteko, nekez azoka gunean eta azoka gunetik kanpo kontrolaezina suertatzen ari da aspaldi ikusi ez direnen arteko solasaldien etetea. Salmenta eremu barruan, 65 urtetik gorakoak ari dira erosten eta kasuren batean baita saltzen ere. Bestetik, azokak sortzen duen dei efektua ematen ari da. Ordizia da horren adibide garbia. Inguruko herrietatik etortzen dira, batez ere pertsona helduak, hain juxtu, gehien babestu behar ditugunak. Herri ezberdinetako udaltzainekin egotea besterik ez daukagu beraiek, hau da, neurriak beterazi behar dituztenak, zer dioten jakiteko.

Azokak, gurean, ekoizten dena salerosketatik haratago doan zerbait dira, sozializatzeko balio izan dute eta balio dute, batez ere helduenei. Eta hain juxtu horrek sortzen du dei efektua. Azoka eremu kanpoko hori da kontrolatu ezin daitekeena. Supermerkatuak sei edo zazpi egunetan irekitzen diren bitartean, azoka egun bakarrean egiten da.

Udal gobernua azokaren kontra dagoenaren leloa eta azoka politikoki erabiltzea ez da zilegi. Udal gobernuak bere lehentasunen artean hasieratik izan du lehen sektorea eta azoka. Etengabe azokaren aldeko ekimenak sortu eta sustatzen jarraitzen du; pentsa, hileko lehen larunbateko azoka berezia ezarri zuen.

Udalean, zoritxarrez astero, birusak jota hiltzen ari diren senitartekoekin harremanetan jartzea tokatzen ari zaigu. Maitatuenei azken agurra eman gabe geratzen ari direnak. Horien azalean ere jarri gaitezen. Ez dakigu birusaren hedatzea non eteten den.

Arduraz, erantzunkizunez eta zuhurtziaz jokatzea tokatzen zaigu eta marra oso finen gainean ari gera dantzan. Jakitun gera guztiak asetzea ezinezkoa dela eta askoren begietan, hartutako neurriak gehiegizkoak izan daitezkeela. Horregatik inoiz baino gehiago gizarte-kohesioa, elkartasuna eta konfidantza ezinbestekoak dira. Momentu oso zailak suertatzen ari zaizkigu denoi, ea borondate eta malgutasun pixka batekin, elkartuago ateratzen geran egoera honetatik.

Hala ere Beasaingo azoka itzuliko da, berandu baino lehenago bada hobe, eta orduan ziur gaude ekoizle eta baserritarrak asko poztuko direla udal gobernu hau bezala “Beasaingo azoka ORAIN!” plataforman sinatu duten guztiak bertan erosten ikusten dituztenean, hori izango baita benetako babesa eta bultzada azokari. Arriskatzeak merezi du heriotzaz ari garenean?… Azken finean gizaki hutsak gara.

Azoka bertan behera geratu zenetik, Udalaren zeregin nagusiak koronabirusa hedatzeko arriskua saihestea eta merkatuko produktuak eskuratu eta udalerrian behar gehien duten pertsonen artean banatzea dira

Beasaingo Udalak asteroko eta hileko azoka ez egitearen arrazoi nagusiak plazaren inguruan honek eragingo lukeen dei-efektua eta jende-pilaketak saihestean datza. 

Zuhurtziaz eta zentzuz jokatzeak kutsatze-zantzu oro saihestera eta ondorioz Beasaingo azoka ez egitera eraman du udala. Izan ere, salmenta-postuak kokatzen diren esparruaren barruan hartzen diren prebentzio- eta kontrol-neurri zorrotzak hartuta ere, plazatik kanpo hutsean geratzen dira neurri horiek bermatzerik ez bait dago. Azokan biltzen diren bezero asko adinekoak dira eta beraz, hain juxtu lehentasunez babestu nahi den jendea. 

Hori dela eta, azokara joaten diren ekoizleekin harremanetan jarraitzen du udalak, eta duela aste batzuk hasitako etxez etxeko salmentako produktuen soberakinak erosteko konpromisoari eusten dio. Era honetan, udal gobernuak Km 0 produktuak saltzen dituen ekoizlearen ekonomiari arnasa ematen dio.

Udalak orain arte bezala ekoizleei produktuak erosten jarraituko du, Gurutze Gorria  eta Caritasen bidez banatzeko, bereziki behar eta zailtasun gehien duen jendearen artean. Babespeko etxebizitzak, adineko egoitza eta pertsonak, eta ongizate sailetik beharra duten atzemandako jendea dira orain arte bezala produktu horien hartzaileak.

Horrekin guztiarekin, komeni da gogoraraztea tokiko ekoizleek merkatuan eskaintzen dituzten produktuen etxez etxeko salmentak bere bideari eusten diola. Udal gobernuak beti izan du bere lehentasun nagusien artean tokiko ekonomia eta merkataritza sustatzeko eta laguntzeko ekimenak aurrera eramatea. Saltzaileen zerrenda eta eskaerak egiteko harremanetarako bitartekoak erantsitako koadroan daude laburbilduta.

Beasaingo azoka taula